OweBulls unxusa ezakhe ukuzibamba ziqine kowe-URC neSharks

Nhlanhla Hudla

UMQEQESHI weBulls uJake White unxusa abadlali bakhe ukuba bazibambe ziqine njengoba bezodudulana neSharks kwi-semi final ye-United Rugby Championship ngoMgqibelo ngo-18h15 eLoftus Versfeld, ePitoli.

Lo mdlalo ungomkhulukazi ebholeni lombhoxo kuleli kwazise kuzobe kushukana izinkunzi ezisele zombili emaqenjini aseNingizimu Afrika.

NGUMQEQESHI weBulls uJake White.

Ekhuluma ngaphambi kwalo mdlalo, uWhite unxuse abadlali bakhe ukuba bazibambe ziqine kulo mdlalo kwazise bazobe bedlala nabantu asebebahlule kabili kulo nyaka.

"Kuzomele sisebenze ngokuphindiwe uma sizimisele ngokunqoba lo mdlalo. Sebesihlule kabili ngakho kufanele sikhuphule amasokisi uma sizimisele ngokuyodlala owamanqamu.

"Nginethemba lokuthi sizokwazi ukuyodlala kowamanqamu," kusho uWhite, obheke ukunqoba lo mqhudelwano okokuqala emlandweni wakhe.

Ozonqoba lo mdlalo uzogadulisana nozophumelela phakathi kweLeinster yase-Ireland neGlasgow Warriors yaseScotland bona abazobhekana kwenye
i-semi final ngoMgqibelo ngo-15h45.

IGlasgow yiyona ekhiphe iBulls kulo mqhudelwano nyakenye, yagcina ngokuwunqoba ihlula iStormers yaseWestern Cape kowamanqamu.