Ezifingqiwe

IQHAMUKA nxa zonke imiyalezo yenduduzo ngokudlula emhlabeni kukaMnu Rashid Lombard (74) (osesithombeni esingenhla), owayengumthwe-buli odumile, futhi obambe iqhaza ekuqhakambiseni umculo we-jazz eNingizimu Afrika.

ULombard ushone ngoLwesithathu. Phakathi kwabadlulise amazwi enduduzo kubalwa uMengameli uCyril Ramaphosa, uMnu Gayton McKenzie onguNgqongqoshe wezemiDlalo, ubuCiko namaSiko nenqwaba yosaziwayo.

Wake wasebenzela imithombo yezindaba ehlukene, okubalwa kuyona iBBC, NBC ne-AFP.
Waziwa kakhulu nanjengomsunguli weCape Town International Jazz Festival (CTIJF).

Ngowe-2014, waklonyeliswa ngendondo yesiliva yeNational Order of Ikhamanga ngomsebenzi wakhe emkhakheni wezobuciko, okubalwa kuyona nokuqhakambisa umculo we-jazz.

Kuxwayiswa ngamakhaza ashubile

ABESIMO sezulu baxwayisa ngesimo sezulu esingesihle, esihambisana namakhaza ashubisa umnkantsha kule mpelasonto.

Kunomsinga obandayo olindelekile ngoMgqibelo ekuseni, ozoletha amakhaza kule mpelasonto, ikakhulukazi ezingxenyeni ezisentshonalanga yezwe.

AbeSnow Report, bexwayisa nangokukhithika kweqhwa okulindelekile kule mpelasonto ezingxe-nyeni zeKwaZulu-Natal, Eastern Cape, Free State, Gauteng, Mpumalanga, Western Cape, neLesosho.

KwaZulu-Natal naseGauteng kulindeleke ukuba iqhwa likhithike kusukela ngoMsombuluko.

Bavele enkantolo abasolwa
ngokusoconga owe-IFP

ABALISA ababili abasolwa ngokusoconga umholi
we-IFP, bavele eNkantolo yeMantshi yasePalm Ridge, eGoli ngoLwesine.

Laba balisa abaneminyaka ewu-30 no-32, babhekene necala lokubulala nelokuzama ukubulala. Bayanyaniswa nokusocongwa kukaMnu Khethamabala Sithole (osesithombeni esingenhla), obengusotswebhu we-IFP ePhalamende, eCape Town.

UMnu Sithole ozongcwatshwa ngeSonto eNkandla, wadutshulwa wabulawa ehostela iBuyafuthi, eKatlehong, eGoli. Kulesi sigameko kwalimala nabanye ababili, okubalwa kubona noMnu Alco Ngobese, onguNobhala we-IFP eGauteng.

I-SAPS ithi kunabanye abasolwa okulindele ukuba baboshwe.

UMkhwanazi ukhala ngokuxega kwemingcele yakuleli

ISIKHULU samaphoyisa KwaZulu-Natal, sikhala  ngokungaqiniswa kwemingcele elawula ukungena nokuphuma kwabantu eNingizimu Afrika njengembangela yokwanda kobugebengu.

UKhomishana wamaphoyisa KwaZulu-Natal, uLt- General Nhlanhla Mkhwanazi (osesithombeni esingenhla), ubekhuluma oKhozini FM, wathi amaphoyisa ayawenza umsebenzi wokulwisana nobugebengu, kodwa uphiko lokushushisa lusebenza ngendlela ebuyisela emuva umsebenzi wamaphoyisa.

Uthe nabantu bangaphandle abangene kuleli ngokungemthetho bayabababopha, kodwa badedelwe ezinkantolo.

"Kufanele kuqiniswe imithetho nezokuphepha emingceleni yethu," kusho uMkhwanazi.