Kuzokhunjulwa inkakha 
ye-jazz eThekwini

 Lucky  Cain

IZOKHUNJULWA ngedili lomculo inkakha ye-jazz yakuleli engasekho emhlabeni uSipho Gumede, ngomcimbi ozoba ngomhla ka-30 ku-Agasti, eBat Centre, eThekwini.

Lo mcimbi wokuhlonipha nokukhumbula le nkakha uzobe ubophele ezinye izinkakha kulo mculo, okubalwa kuzo uDon Laka, uBongani Nkwanyana, uNomusa Ndawo nabanye.

Kulindeleke ukuba uhanjelwe ngabathandi balolu hlobo lomculo njengoba sekuphele cishe iminyaka ewu-22, uGumede adlula emhlabeni.

UGumede uthathwa njengenye yezinkunzi zomculo we-jazz kuleli. Wakhipha ama-albhamu angaphezulu kwawu-14, iningi lawo elikhonjiswe ukuthakaselwa ngabathandi bomculo.

Phakathi kwawo kubalwa iBanana Jive, Ubuntu-Humanity, iBlues Of My Mother, iFrom Me To You, i-African Sunrise, iNew Era namanye.

NguDon Laka ongomunye wabazonandisa emcimbini wenkakha eseyadlula emhlabeni uSipho Gumede.

Udlule emhlabeni ngo-2004 ngemuva kokuxinwa wukugula. Ubengumbhali wezingoma, umdlali wesiginci nomdidiyeli wezingoma kusukela
ngo-1970, kwaze kwaba uyadlula emhlabeni
ngo-2004.

Amathikithi alo mcimbi ayatholakala eComputicket ngo-R200.

Indodakazi kaGumede engumphathi wenhlangano engayenzi inzuzo iSipho Gumede Music Foundation uMantombi Gumede, ithe umculo kayise wawungagcini ngokujabulisa kuphela, kodwa ubuyisibusiso eNingizimu Afrika nasemhlabeni jikelele.

UMantombi uveze ukuthi bakhethe ukwenza lo mcimbi eBat Centre, ngenxa yokuthi iyindawo ebisenhliziyweni kayise, njengoba esebenze kakhulu khona, eqeqesha futhi ethuthukisa amanye amaciko.

Uchaze nangohlu lwalabo abazonandisa njengoba ethe uDon Laka usebenze kakhulu noyise eqenjini iSakhile, kanti uBongani noNomusa bangabanye abaphume esandleni sakhe.

Uthi lo mcimbi kuzobe kungowesibili wokukhumbula uyise, owokuqala wenzeka ngesikhathi kuhlasele ubhubhane lweCovid-19
ngo-2021.

Uphethe ngokuthi uyafisa ukuthi lo mcimbi wokukhumbula uyise wenzeke minyaka yonke, inqobo nje uma bezothola uxhaso ukuze bakwazi ukuwenza ngokusezingeni eliwufanele.