NGUWELILE Mchunu ozogubha usuku lokuzalwa, ngendumezulu yomcimbi ezoba ngomhla ka-9 ku-August, eKhethelo Lifestyle, eDukuduku, eMtubatuba.

Uzothinta nezomshado wakhe

Mthobisi Sithole

UZOFUNDISA abesifazane ngokubaluleka kokuzibambela mathupha emabhizinisini, bangathembeli kwabesilisa empilweni.

Lokhu kuzokwenziwa nguWelile Mchunu, emgubhweni wosuku lwakhe lokuzalwa, azolugubha ngendumezulu yomcimbi ezoba ngomhla ka-9 ku-August, eKhethelo Lifestyle, eDukuduku, eMtubatuba.

Uthi njengoba esebuya emshadweni, kuningi akufundile, afisa ukucija ngakho imbokodo ngosuku lwabesifazane. Utshele leli phephandaba ukuthi uzobe egqugquzela imbokodo ngokuzenzela, inganciki kwabesilisa.

"Amadoda ayajikelana, mina sengibuya nasemshadweni, kuningi engikwaziyo okwenzekayo phakathi komuntu wesifazane nowesilisa othandweni lomshado.

"Ngakho-ke abesifazane ngifuna ukubakhiphela ingonyuluka. Lolu suku ngizolugubha nabo, ngibagqugquzele ngokuthi mabasukume bazibambele empilweni, kubekhona izindlela abazenzayo zokuziphilisa nezingane emakhaya.

"Kubalulekile ukuzimela uma ungumuntu wesifazane," kusho uWelile.

Uthe ukuzinyanyiswa kwakhe ngabantu ezinkundleni zokuxhumana njengoba bamshayela indishi yomnikelo wase ethenga ikhishi, kumvule amehlo, kwamenza wakwazi nokuzimela.

"Bengingumuntu ocelayo, oxakekile empilweni, kodwa namhlanje sengizimele, sengiyakwazi ukubeka isinkwa etafuleni.

"Lokhu-ke kuwuphawu lokuthi thina besifazane masisebenze kanzima," esho.

Uthi kuzobe kuqala ukuhlangana kwabesifazane endaweni yaseMtubatuba, kugujwa usuku lwakhe.

Uthi unesifiso sokuthi minyaka yonke ahlanganise abesifazane eMtubatuba, kuboniswane ngempilo eya phambili.

"Ngithi imbokodo mayisukume yonke, ngizivulile nezandla kwabafuna ukuzodayisa kulo mcimbi, futhi kumahhala ukwenza lokho.

"Inhloso yami wukuthi ngifuna abantu abaphila ngokudayisa, bathole amasenti ngalolu suku," kusho uWelile.

Kulo mcimbi kuboshelwe omaskandi okubalwa kubona uNtencane, uKhuzani, uMthandeni SK, uMzukulu, uNjoko, uBahubhe, uMjolisi, uJaivazimnike, uFeza, uShenge waseHlalankosi, uSwidi, uNjabulo Langa, uCevuzile, uNdoni, uMkhulekelwa, uQuality, iMfezi, uMnyovu, uDumakahle, iNkosi Yamagcokama, uMbeje, uMenzi, uMgojeli, kanti kwezokholo uJumbo, uThinah Zungu noQiniso Nsele.

Amathikithi abiza u-R200 eComputickets, eCheckers, eShoprite nase-Usave.

Ayatholakala nasekhishini lakhe eMtubatuba, nasemcimbini azobe edayisa ngosuku lwawo. Awezicukuthwane abiza u-R600.
mthobisis@ilanganews.co.za