IDowns izokhetha amabala ekuthengeni abadlali

Ithi ngeke isayinise uma kungenasidingo njengoba iyogijima iFifa Club World Cup

NGU-THLOPIE Motsepe oyisikhulu seMamelodi Sundowns.

Mfanafuthi Ndlovu

IMAMELODI Sundowns izokhetha amabala uma seyingena emakethe njengoba kuzovuleka iwindi lokusayinisa abadlali emakilabhini azobamba iqhaza kwiFifa Club World Cup, ezoqala maphakathi noNhlangulana (June) isongwe ngoNtulikazi (July) e-United States of America (USA).

Le kilabhu izokuya kulo mqhudelwano ngemuva kokugijima owamanqamu weCaf Champions League njengoba izodlala umlenze wesibili nePyramids yaseGibhithe ngeSonto ngo-19h00 eCairo. Emlenzeni wokuqala obukuleli ngeledlule, la makilabhu abambane ngo-1-1 eLoftus Stadium, ePitoli.

NGU-VAUGHAN Croeser obemele inkampani yakwa-AB InBev noThlopie Motsepe ohola iMamelodi Sundowns ngoLwesibili eGoli. Le kilabhu nale nkampani basayine isivumelwano sokusebenzisana.

UTlhopie Motsepe onguMengameli weSundowns, utshele ILANGA Lempelasonto emcimbini wokwethulwa kokusebenzisana kwale kilabhu nabakwaCarling Black Label ngoLwesibili eGoli, ukuthi ngeke bavele bathenge nje umdlali abangenaso isikhala sakhe.

"Sizongena emakethe uma kuqhamuka umdlali ozosinika esingenakho, hhayi noma ngubani. Kubalulekile ukuba sihloniphe laba abakhona. Lo mshado (nabakwaCarling) ufike ngesikhathi esihle njengoba sisembhidlangweni wokukhulisa ikilabhu ukuba ihlonishwe kakhulu e-Afrika nasemhlabeni jikelele.

NGU-ATHUR Sales noMarcelo Allende bamaSandawana.

"Sizimisele ngokwenza kahle kule miqhudelwano emibili - kowamanqamu weCaf Champions League nakwiFifa Club World Cup.

"Ngingajabula uma singakwazi ukuqukula iChampions League, sithole inkanyezi yesibili. Nokho kangifuni ukufaka abadlali ngaphansi kwengcindezi," esho.

AbakwaCarling bamemezele ukuthi bazobeka obhazabhaza bomabonakude emapaki ngesikhathi seFifa Club World Cup, ukuze abalandeli bezokwazi ukubuka kahle imidlalo yamaSandawana, ngaphansi kwesiqubulo esithi, "Champions To The World".