'Izokwelekelelwa yingcindezi esezitheni iDowns'

UMshishi uthi iPyramids izothwala kanzima ukuvimba amaSandawana ukuthola igoli ekuhambeni kowamanqamu weCaf

Senzo Sokhela

ISILOMO seMamelodi Sundowns, uThemba "Mshishi" Zwane sikholwa wukuthi iPyramids FC yaseGibhithe - abazobhekana nayo emlenzeni wesibili womdlalo wamanqamu weCaf Champions League - yiyona engaphansi kwengcindezi enkulu, okuzosebenzela amaSandawana.

Umdlalo wala makilabhu uzokuba ngeSonto
ngo-19h00 eCairo, eGibhithe. Emlenzeni wokuqala obukuleli ngeledlule la makilabhu ashayane aze abukana kuba wu-1-1.

IDowns iya kulo mdlalo nje, kayinikwa lutho kwazise iPyramids ishaye igoli elimqoka ekuhambeni. Nokho uZwane - odlala esiswini kwiDowns - ubona ngenye indlela njengoba beya kulo mdlalo.

"Thina kasinayo ingcindezi, yibona okufanele benze isiqiniseko sokuthi kasilitholi igoli njengoba sizokube sisekuhambeni. ISundowns inalo igoli, noma kanjani sizolishaya elinye eGibhithe. Siyakwazi esikuyela kulo mdlalo, wukuwunqoba nje kuphela.

"Yisikhathi sethu manje sokuthi sinqobe le nkomishi, lokho sizokulwela. Noma kanjani sizobuya nayo," esho.

Uma iSundowns iyinqoba le ndebe izokuba yikilabhu yokuqala yaseNingizimu Afrika ukuyiqukula amahlandla amabili njengoba iyithathile nango-2016 yehlula kowamanqamu iZamalek yakhona belu eGibhithe.

Enye ikilabhu yakuleli eseyake yayinqoba iChampions League yi-Orlando Pirates ngo-1995 yehlula i-Asec Mimosa yase-Ivory Coast kowamanqamu.

Kule sizini iBucs iwashiswe ijezi yiPyramids kwi-semi final, okuphuthisele abathandi bakanobhutshuzwayo bakuleli owamanqamu weChampions League obewuzogijinywa ngamakilabhu aseMzansi kuphela.