Ezifingqiwe

UMENGAMELI Cyril Ramaphosa (osesithombeni), uyalele iBamba likaNgqongqoshe wamaPhoyisa, uSolwazi Firoz Cachalia noMkhuzi wamaPhoyisa, uGen Fannie Masemola, ukuba basungule uphiko oluyisipesheli oluzophenya ngabathintekayo embikweni weKhomishini kaMadlanga, ephenya ngokugxambukela kwabathile ekusebenzeni kwamaphoyisa.

NgoLwesine ihhovisi likaRamaphosa likhiphe isitatimende, lithi umengameli ufuna izinhlaka zomthetho zisebenze ngokubambisana nangokushesha, ukuqinisekisa ukuthi iziphakamiso zokushushisa abathintekayo ziyasukunyelwa.

Kuvele ukuthi umbiko wesikhashana okhishwe yile khomishini, uphakamise ukuthi bathathelwe izinyathelo abathinteka ekuphulweni komthetho.

LUHLEHLISELWE umhla ka-6 kuFebruary, uhlelo lokuqala kokuqulwa kwecala likaMnu Vusimuzi "Cat" Matlala (osesithombeni), nomkakhe asolwa naye, uNkk Tsakane Matlala.

UMatlala nomkakhe bebevele nabanye izolo ngoLwesine eNkantolo eNkulu yaseGoli njengoba bekuqala izinhlelo zokulungiselelwa kokuqulwa kwecala ababhekene nalo.

Babhekene necala lokuzama ukubulala uNkz Tebogo Thobejane, owayeyisinqandamathe sikaMatlala.

Phakathi kweziphakamiso azenzile uMatlala nethimba lakhe labameli abasha, wukuthi agcinwe ejele laseGauteng njengoba kuzobe kuqhubeka icala.

Kuzokhumbuleka ukuthi uMatlala wasuswa eGauteng, wayogcinwa ejele iBhongweni Supermax, eliseKokstad.

ADLULISELWE eNkantolo yesiFunda yaseMgungundlovu amacala amathathu abhekene neNkosi yaKwaNxamalala, uSimphiwe Zuma.

INkosi uZuma ibivele ngoLwesithathu eNkantolo yeMantshi yaseHowick, nabanye emangalelwe nabo; okunguThobani Hlongwa, iKhayelihle Shabalala noDeon Mathonsi.

Omunye ummangalelwa kuleli cala, uThembelani Mbatha, ubengekho enkantolo njengoba ebhekene nelinye icala elingahlangene naleli, elithinta ubugebengu okuthiwa wabenza KwaMakhutha, eThekwini.

Inkosi ibhekene namacala amathathu okungelokubulala induna, uMnu Qalokunye Zuma; elokubulawa kwekhansela leDA, uMnu Nhlalayenza Ndlovu nelokubulawa kukaMnu Xolani Ndlovu Ntombela.

INkosi uZuma ingaphandle ngebheyili ka-R25 000. Yona nemangalelwe nabo, kulindeleke ukuba bavele ngoMsombuluko kule nkantolo yaseMgungundlovu.

BATHEMBISE ukuhoxisa ukuqhinqa kwabo ngaphandle kwamahhovisi oMnyango wezeMfundo KwaZulu Natal, eMgungundlovu, othisha abangaqashiwe, osekuphele isikhathi eside bekhala ngokujika nelanga.

Benze lesi sethembiso emuva kokuhlangana nezikhulu zomnyango.

Labo thisha banqume ukuqhinqa ngaphandle kwala mahhovisi emuva kokuhamba kwesikhathi bengaqashwa, yize bezifaka izicelo zomsebenzi.

Abanye bakhala ngenkohlakalo ohlelweni lokuqasha kulo mnyango.

Labo thisha bazwakalise ukuthi banethemba lokuthi ukuhlangana kwabo nezikhulu zomnyango kuzovuna izithelo, njengoba sebekhathele wukuhlala emakhaya bengayitholi imisebenzi.

ABENKAMPANI yamabhanoyi, iFlySafair, bathi baphenya nge-video esabalele ezinkundleni zokuxhumana, etshengisa amalungu e-EFF - abeyokweseka umholi wawo, uMnu Julius Malema enkantolo - ephazamisa ebhanoyini ebelisuka eGoli, liya e-East London.

Kule video bekuvela amalungu ale nhlangano amanye egqoke umfaniswano ecula, eshabasheka ephaseji, kubonakala ukuthi abanye abagibeli kabakhululekile.

Lesi senzo sikhulumise abaningi ezinkundleni zokuxhumana, kubatshazwa indlela yokuziphatha kwe-EFF. Bekukhalwa  nangeFlySafair, ukuthi kungani ingathathi izinyathelo.

AbakwaFlySafair bakuqinisekisile ukuthi udaba luphenywa ngaphakathi.