NGU-DAVID Thidiela ongusihlalo weLeopards.

ISITHOMBE NGABE: BACKPAGEPIX

Mfanafuthi Ndlovu

ISABHEKENE nobunzima iBlack Leopards bokungakwazi ukusayinisa abadlali abasha ngenxa yesigwebo seFifa esisemahlombe ayo, selokhu kuqale isizini ka-2025/26.

Lokhu kutshelwe ILANGA Lempelasonto nguTshifiwa "Chief" Thidiela oyindodana kaDavid Thidiela, ongusihlalo wale kilabhu.

Unekele leli phephandaba ubunzima ababhekene nabo njengoba benqindwe amandla okusayinisa abadlali yiFifa. Uthe okwamanje basebenza ubusuku nemini ukuzama ukuxazulula lolu daba olubafake kwenkulu inkinga, eholele ekutheni iPremier Soccer League (PSL) ibaphuce amakhadi abadlali abasha.

"Kubi ngoba konke lokhu kufike ngesikhathi sokuqala kwesizini, singalindele (okwenze badliwa ngo-3-0 kowokuvula). Kunzima ngoba ngesizini edlule sisale ngephuzu ukungena emidlalweni yokuhlungela ukungena kwiBetway Premiership, okungehlanga kahle kithina.

"Konke kulele kubadlali esinabo ngalo mdlalo wethu ne-University of Pretoria weligi ngeSonto, ukwenza konke okusemandleni ukuthola okuthile.

"Sizamile ukusayinisa abadlali kepha kwangalunga, okwamanje kusenzima, kasikwazi ukusayina abadlali. Sinethemba lokuthi sizosithola isixazululo ngokushesha, siphume kule nkinga," ebalisa.

YINGXENYE yesikwati seLeopards ebigijima ngaso ngesizini edlule, esicishe sayifaka emidlalweni yama-play off okunyukela kwiBetway Premiership njengoba siqede silele endaweni yesine.

ISITHOMBE NGABE: BACKPAGEPIX

Nokho ngokuthola kwaleli phephandaba, yizikhulu zeLeopards ezaba nephutha ngokudembesela kulolu daba, ngoba zazinethemba lokuthi zizokwazi ukuphunyuka.

 Kuthiwa incwadi ephuma kwiFifa yaqala ukufika kusuka ngoMay, kodwa ngaleso sikhathi yayibhekene neCape Town All Stars eyathengwa yiLeopards. Nokho ngemuva kwesikhathi, kuqhamuke eyokugcina seyibhekene neLeopards, bayishaya indiva abale kilabhu.

Kuthiwa iLeopards izovela ekomidini lePSL lokuqondisa ubugwegwe emasontweni azayo, ngokuyifaka ehlazweni njengoba emdlalweni wokuvula ibibophele abadlali abawu-10.

Kuvela ukuthi emdlalweni weTuks izokube inabadlali abawu-14, ngoba kuyiphoqe ukuba ibuyise abadala abebefakwe amasondo yile kilabhu.

Isiyonke imidlalo yeMFC engempelasonto imi kanje:-
NGOLWESIHLANU
ESolomon Mahlangu: Casric Stars vs Milford FC 15h00.
NGOMGQIBELO
EMxolisi Dicky Stadium: Hungry Lions vs Cape Town City 15h00.
EGlobal Village: Baroka FC vs Midlands Wanderers 15h00.
EThohoyandou Stadium: Venda FC vs Gomora United 15h00.
KaNyamazane Stadium: Kruger United vs Highbury FC 15h00.
ELucas Moripe: Leicesterford FC vs Upington City 15h00.
NGESONTO
ETuks Stadium: University of Pretoria vs Black Leopards 15h00.
E-NWU Stadium: Lerumo Lions vs The Bees 15h00.