'Udayiswe ngodadewabo' owesifazane osolwa ekufeni kwengane yakwamakhelwane

Mthobisi Sithole

"UDAYISWE ngodadewabo" owesifazane osolwa esigamekweni sokubulawa kwengane, okutholwe isidumbu sayo silahlwe emfuleni eMlazi, eThekwini ngoLwesine.

 Kuthiwa isidumbu sikaNtobeko Xaba (5) (osesithombeni),  sitholwe emuva kokuba amaphoyisa elandele umkhondo womsolwa ontshontshe le ngane, waze wabanjwa eHarding.

Kuvela ukuthi uNtobeko unyamalale  ngoLwesihlanu olwedlule ntambama. Emuva kwalokho kufonelwe unina, uNkz Ntombifikile Xaba,  wafunwa u-R60 OOO ukuze kukhululwe ingane yakhe.

Umthombo weLANGA Lempelasonto uthi lona wesifazane ulale kodadewabo, nayo ingane, okuthe ngokuhamba kwesikhathi, wampintshwa.

ILANGA libikile ngoLwesine mayelana nokunyamalala kukaNtobeko.

Kulo mbiko, uNkz Xaba uveze ukuthi umsolwa wesifazane ongumakhelwane wakhe - okunguyena ogcine ukubonakala nengane eduze komfula eMalukazi - nguyena umsolwa oqanda ikhanda ekunyamalaleni kwayo.

Uthe amaphoyisa asole yena (unina wengane) ngokunyamalala kukaNtobeko.

"Ngesikhathi ngisenamaphoyisa asesiteshini e-GG, eMlazi, abengiphoqa ukuba ngivume ukuthi ngiyazi ngokunyamalala kwengane yami," esho.

Uthe ube esethola umyalezo othi: "Wangihlukumeza ngo-2020, ngaze ngaphuphunyelwa yisisu. Ngakho-ke sekuyisikhathi sokukhokha manje. Ngifuna u-R60 000 uma ufuna ukuthola ingane yakho. Ungawabikeli amaphoyisa."

Uthe umethusile lo myalezo,  kwazise ngo-2020 wayengamazi umsolwa, futhi wayengahlali eThekwini.

Uveze ukuthi ukholwa wukuthi umsolwa ubazi ukuthi kuno-R60 000 yena (unina wengane) angawuthola uma efuna indodana yakhe.

"Kunomngani wami engisondelene kakhulu naye, osanda kuphunyelwa yimali yakhe. Ezinyangeni ezedlule ungiboleke u-R5 000. Ngikholwa wukuthi ubazi ukuthi uma ngiyiboleka kumngani wami, ngeke anganginiki uma izohlenga ingane," esho.

Uthe okumzwise ubuhlungu wukuthi umsolwa ubexhumana nezinye izihlobo zakhe (unina wengane). Kuthiwa ubonakale ehla nengane ngasemfuleni, wabuya esehamba yedwa.

Okhulumela amaphoyisa KwaZulu-Natal, uColonel Robert Netshiunda, uthe kuboshwe owesifazane oneminyaka ewu-39 ubudala, osolwa ngokubulawa komfanyana oneminyaka ewu-5 ubudala, obekubikwe ngoLwesibili lomhla ka-26 kwephezulu ukuthi unyamalele.

Uthe uphenyo lukhombe umsolwa ongumakhelwane wale ngane, ohambe waya eMzimkhulu kwabe sekulandelwa umkhondo.

Uveze ukuthi isidumbu somfana sitholakale sigoqwe ngoblankethi. Uthe uphenyo lusaqhubeka.
mthobisis@ilanganews.co.za