20 | Ezemidlalo
Friday, 28 August 2026
I-Arrows iwufanisa nowamanqamu oweSundowns
Ubalisa ngamathuba alahlwa ngezakhe uGavin Hunt
NGUNHLANHLA Zwane we-Arrows (kwesobunxele) exinwe nguRaoul Daniels weStellies.
ISITHOMBE NGABE: BACKPAGEPIX
Mfanafuthi Ndlovu
ILAMONTVILLE Golden Arrows iwufanisa nowamanqamu umdlalo wayo neMamelodi Sundowns womlenze wesibili kwi-semi final yeMTN8 ongeSonto ngo-15h00 eKing Zwelithini Stadium, eMlazi.
I-Arrows izogijima lo mdlalo yenyukelwe nawukuzethemba emuva kokunqoba umdlalo wayo wokuqala weBetway Premiership kule sizini njengoba ibisigijime emithathu, yonke ephele ngo-0-0.
Inqobe iStellenbosch FC ngo-1-0 wegoli eliqotshelwe enethini nguJunior Dion koweBetway Premiership ngoLwesithathu eMlazi.
UPitso Dladla ocija i-Arrows, uthi ukunqoba iStellies kwenyuse ukuzethemba ngaphambi kokubhekana neDowns ebhaxabule AmaZulu FC ngo-5-2 koweligi ngalo uLwesithathu ebusuku ePretoria.
"Ukudlala kahle kukaDion kungiqinisa idolo ngaphambi komdlalo wethu neDowns. Ngimbona esazosisiza kakhulu ekilabhini," kusho uDladla.
Uthi sekuyisikhathi sokuthi baqale bavivele iDowns. Uthi bazoyihlelela ngendlela yokuthi incisheke umoya kulo mdlalo ezowugijima inengcindezi yokuthola igoli ngokushesha.
Amathikithi alo mdlalo abiza u-R100 ezikhungweni eziwathengisayo.
Ubalisa ngamathuba alahlwa ngezakhe uGavin Hunt
NGU-ASHLEY du Preez.
ISITHOMBE NGABE: BACKPAGEPIX
Ubalise ngokulahla amathuba kwezakhe uGavin Hunt ongumqeqeshi weStellenbosch FC eshaywe yiLamontville Golden Arrows ngo-1-0 koweBetway Premiership ngoLwesithathu ebusuku eKing Zwelithini Stadium, eMlazi.
Igoli enqobe ngalo i-Arrows lishaywe nguJunior Dion okufake le kilabhu umfutho njengoba izovovana inkani neMamelodi Sundowns emlenzeni wesibili we-semi final yeMTN8 ngeSonto ngo-15h00 eKing Zwelithini Stadium, eMlazi.
UHunt usole abadlali bakhe ngokuyeka amathuba amahle okushaya amagoli kulo mdlalo. Uthi ukuba bawasebenzise ngendlela bekuzokhulunywa okunye.
"Ngiphoxekile ngomphumela. Lokhu (kushweba amathuba) kudalwa nawukuthi nginabadlali abaningi abasebancane, abasaqiniswa ukhakhayi.
"Sehlulekile ukumaka abadlali be-Arrows ngendlela, okusidalele izinkinga. Sibe nethuba elihle lokushaya igoli ngesiwombe sokuqala kepha sehluleka. Sizozama ukubuyela ejimini, siyolungisa izinto esingakwazanga ukuzenza kulo mdlalo," esho.
Uthi uzozama nokubuyisa ifomu ka-Ashley Du Preez ochithwe yiKaizer Chiefs ngaphambi kokuqala kwale sizini.