IChiefs igxeka ubugwala bezimbangi

NGUMQEQESHI weChiefs, uFernando Da Cruz.

ISITHOMBE NGABE: BACKPAGEPIX

Senzo Sokhela
 
USOLE izimbangi ngobugwala umqeqeshi weKaizer Chiefs, uFernando Da Cruz, ezakhe zithola iphuzu ekuhambeni, zibambana neRichards Bay FC ngo-2-2 koweBetway Premiership ngoLwesithathu ebusuku ePrincess Magogo Stadium, KwaMashu.

Amagoli eBay ashaywe nguNqaba Xulu, aweChiefs abhakuziswa nguLebohang Maboe - obekuyiphenathi - noSiphesihle Ndlovu.

UDa Cruz usole iBay ngokuba ngamagwala njengoba ethi beyizihlalele nje emuva, ibukela bona bedlala.

"Umdlalo besiwuthwele uqala, kwaze kwabe uyophela. Empeleni iqembu ebelidlala belilodwa, bekuyithina ngoba iBay ibidlalisa okwamagwala, izihlalele nje emuva.

"Ngebhadi sivele saphisana ngamagoli amabili kungenasidingo. Le nto iyasilimaza ngoba sesilahle amaphuzu amane manje.

"Phela nakwiMamelodi Sundowns senze into efanayo. Kuzofanele siyilungise le nto yamaphutha, ngoba asenzela phansi," kusho uDa Cruz.

NGUTHABO Molosiane (42), noLebohang Maboe beChiefs, bezama 'ukuhlanganisela' uThulani Gumede weBay.

ISITHOMBE NGABE: BACKPAGEPIX

Nokho okucacile selokhu kuqale isizini, wukuthi iChiefs ibuye yenzelwe phansi ngunozinti wayo, uBrandon Peterson, ovele avuzise amagoli alula.

Nakulo mdlalo nguyena ophisane ngegoli lokuqala ehluleka wukukhipha ibhola abeliphaselwe kahle nguThabo Molosiane, oyisitobha sale kilabhu.

Nangesikhathi iChiefs iphuma kwiQuarter final yeMTN8, yilo nozinti owafaka enethini yakhe ibhola elaligotshwe yisitobha seLamontville Golden Arrows, uKhulekani Shezi.

Wayengamile endaweni efanele epalini, okwathi esezama ukukhipha umhlola ekhaya, wavele walikhalakathisela enethini yangakubo ibhola.