NGUTEBOHO Mokoena (4), ejabula nozakwabo emuva kokushaya igoli bebhekene namaZulu FC.

ISITHOMBE NGABE: BACKPAGEPIX

Senzo Sokhela
 
KUBUYE ithemba kuMiguel Cardoso ongumqeqeshi weMamelodi Sundowns ngesicoco seMTN8, ezakhe zithumela umyalezo oshubile kwizimbangi abazobhekana nazo kulo mqhudelwano.

IDowns izodlala neLamontville Golden Arrows emlenzeni wesibili weSemi final yeMTN8 ngeSonto ngo-15h00 eKing Zwelithini Stadium, eMlazi.

Emlenzeni wokuqala iDowns iguqe ngo-1-0 ngeledlule eLucas Moripe Stadium, e-Atteridgeville.

Izoya emlenzeni wesibili ihambela phezulu njengoba inenebule AmaZulu FC ngo-5-2 koweBetway Premiership ngoLwesithathu ntambama, eLoftus Stadium, ePitoli.

Amagoli eDowns ashaywe nguBrayan Leon amabili, uTeboho Mokoena, uTashreeq Matthews noBennet Mokoena. AwamaZulu abhakuziswe nguThando Ngwenya.

Ne-Arrows ihambela phezulu njengoba ingakavuzisi goli kule sizini, ngoLwesithathu ebusuku ihlule iStellenbosch FC ngo-1-0 koweligi eMlazi.

UKUDANGALA bekubhalwe ebusweni kubadlali beDowns emuva kokuguqiswa yi-Arrows emlenzeni wokuqala weSemi final yeMTN8 ngeledlule.

ISITHOMBE NGABE: BACKPAGEPIX

UCardoso uthi indlela abanqobe ngayo uSuthu kulo mdlalo, ibuyise ithemba njengoba beya koweMTN8 ngempelasonto.

"Umdlalo wethu ube muhle kakhulu yize ingazange ingijabulise indlela esivuzise ngayo amagoli. Okungichaze kakhulu yisibalo samagoli esiwashayile.

"La magoli anginika ithemba lokuthi sizowaphendula amatafula emdlalweni wangeSonto. Siyobhekana nezimbangi ezehlukile, kodwa noma kanjani sizofika kulo mdlalo sizilungiselele kahle," kusho uCardoso.

AmaSandawana afuna ukuqeda ishobolo eliwehlele ngesizini edlule lokunganqobi sicoco kwezidlalelwa ngaphansi kwePremier Soccer League (PSL), okucishe kwalahlekisela uCardoso ngetoho.

Nokho umsebenzi kaCardoso uhlengwe wukuthi wakwazi ukuhola le kilabhu inqoba iCaf Champions League, okuyisicoco esikhulukazi kwezidlalelwa ngamakilabhu ase-Afrika jikelele.

* Kwenye i-semi final, i-Orlando Pirates izodlala neSekhukhune United ngoMgqibelo ngo-15h00 e-Orlando Amstel Arena, eSoweto.

Emlenzeni wokuqala obuseLimpopo ngeledlule, iBucs inqobe ngo-1-0.