NGUWAYDE van Niekerk

Mzwamandla Zondi

IBOPHELE inqanawe yesikwati iNingizimu Afrika kwiCommonwealth Games, ezoqala mhla ka-23 kuJuly, isongwe mhla ka-6 ku-August eGlasgow, eScotland.

I-Athletics South Africa (ASA) imemezele abasubathi abawu-68 abazokube bemele izwe kulo mqhudelwano, odlalwa ngamazwe ayengaphansi kwengcindezelo yamaNgisi.

Phakathi kwabasubathi abamenyezelwe yi-ASA, kukhona u-Akani Simbine ozokube ebagadulisa kwi-100m, kanti kubhekwe ukuba abe ngukaputeni weqembu.

Kukhona noWayde van Niekerk ophethe irekhodi lomhlaba le-400m, alenze kuma-Olympic ngo-2016 eBrazil. Kulo mqhudelwano uzogijima i-200m ne-4x400m.

Kwabanye ababhekiwe ukuphakamisa ifulegi lezwe, kukhona uPrudence Sekgodiso owenza i-800m.
Lo msubathi ube nempelasonto enhle edla umhlanganiso kwi-1500m kwiKwaZulu-Natal Senior Track & Field eKings Park Athletics Stadium, eThekwini.

NGUPRUDENCE Sekgodiso.

Kuleli qembu kunabasubathi abawu-10 abaphethe amarekhodi aseNingizimu Afrika emabangeni abo.

Kubona kubalwa u-Adriaan Wildschutt (10 000m), uMarione Fourie ozobagadulisa kwi-100m H.

IKwaZulu-Natal izokube imelwe nguZakithi Nene kulo mqhudelwano. UNene akakwazanga ukuba yingxenye yeKZNA Champs ngeledlule njengoba esanesa ukulimala.

I-ASA yamukele nabasubathi ababili ababuya ekulimaleni; okunguJovan van Vuuren noZeney van der Walt okungabanye babasubathi abaphethe amarekhodi emabangeni abo.

NGU-AKANI Simbine.

Kuleli qembu kunabasubathi abasebancane, abafike ngamandla, okunguBayanda Walaza noNaeema Jack.

Ngaphandle kokugijima kulo mqhudelwano, kusuke kuqhudelwana kwezokubhukuda, i-tennis, i-table tennis, isibhakela, i-cricket, i-rubgy sevens, i-netball, i-hockey, i-judo ukubala nje embalwa.

INingizimu Afrika ijwayele ukwenza kahle kule midlalo, njengoba kusukela yaqala ukuba yingxenye yayo, isihlomule ngezindondo eziwu-416.

Amagolide awu-137, amasiliva awu-13 ezethusi zibe wu-147.

Emidlalweni eyedlule eyayiseBirmingham, e-England ngo-2022, kwanqoba i-Australia ngezindondo eziwu-179.

INingizimu Afrika yalala kunombolo 9 ngezindondo eziwu-27, okungamagolide awu-7, amasiliva awu-9 nezethusi eziwu-11.