NGU-ETHAN Hooker obuyayo kwiSharks.

SAZI M

KUBUYA umdlali omqoka kwiHollywoodbets Sharks ezogadulisana neCardiff yaseWales kowe-United Rugby Championships namuhla ngo-19h00 eHollywoodbets Kings Park Stadium, eThekwini.  

OShaka abahambela phezulu emuva kokubhaxabula iMunster yase-Ireland ngo-45-0 ngeledlule, bazobhekana neCardiff sekubuye u-Ethan Hooker odlala enkabeni (13), obengekho ngenxa yokuxinwa ngezomndeni.

Lo mdlali obuye ayibambe kumaBhokobhoko - futhi oke wagijima isikhathi eside ephikweni (14) - uzoyibamba enkabeni nokaputeni wakhe u-Andre Esterhuizen (12).

ISharks enenqwaba yabadlali abalimele - iningi labo eligijima kumaBhokobhoko - iwadinga ephelele amaphuzu alo mdlalo weCardiff, futhi kuyaphoqa ukuba ilwele nokuthola iphuzu lebhonasi uma izimisele ngokudlulela esigabeni somkhumulajezi, esidlalwa ngamaqembu awu-8.

Njengamanje ilele endaweni ka-11 ngamaphuzu awu-29, emidlalweni ewu-13. Isele ngamaphuzu awu-6 kwiVodacom Bulls esendaweni ka-8 ngamaphuzu awu-35.

YIZILOMO zeSharks, uSiya Kolisi noBongi Mbonambi ezizobe zingekho leli qembu libhekene neCardiff namuhla, ngenxa yokulimala.

Umqeqeshi waleli qembu, uJP Pietersen, ongenzanga izinguquko ezitheni eqenjini elibhudluze iMunster, uphoqelekile ukufaka uBradley Davids kwi-scamhalf (9), endaweni kaGrant Williams olimele.

UWilliams ujoyina inqwaba yozakwabo abasemuseni kadokotela, okunguBongi Mbonambi, u-Aphelele Fassi, uBryce Calvert, u-Ethan Bester, uFrancois Venter, uGrant Williams, uJaco Williams, uJurenzo Julius, uLili Bester, uManu Tshituka, uMarvin Orie, uMatt Romao, uRuan Dreyer, uSimphiwe Matanzima, uSiya Kolisi, uSiya Masuku, uTinotenda Mavesere noTrevor Nyakane, kanti u-Eben Etzebeth umisiwe.

Selilonke iqembu leSharks elizobhekana neCardiff, limi kanje:-
1. Phatu Ganyane
2.Fez Mbatha
3. Hanro Jacobs
4. Jason Jenkins
5. Emile van Heerden
6. Phepsi Buthelezi
7. Vincent Tshituka
8. Nick Hatton
9. Bradley Davids
10. Jordan Hendrikse
11. Makazole Mapimpi
12. Andre Esterhuizen (C)
13. Ethan Hooker
14. Yaw Penxe
15. Luan Giliomee

 Ebhentshini
16. Eduan Swart
17. Ox Nche
18. Vincent Koch
19. Corne Rahl
20. Jannes Potgieter
21. Jaden Hendrikse / Ross Braude
22. Jean Smith
23. Le Roux Malan

Isiyonke imidlalo ye-URC kule mpelasonto imi kanje:-
NGOLWESIHLANU
EHollywoodbets Kings Park: Sharks vs Cardiff Rugby 19:00
E-Aviva Stadium: Leinster vs Llanelli Scarlets 21:45.
EScotstoun Stadium: Glasgow Warriors vs Benetton Rugby 21:45.
NGOMGQIBELO
ELoftus Versfeld: Bulls vs Munster 14:00
EThe Sportsground: Connacht vs Ospreys 16:15.
E-Ellis Park Stadium: Lions vs Dragons 16:30
E-DHL Stadium: Stormers vs Edinburgh 19:00.
EStadio Sergio Lanfranchi: Zebre vs Ulster 21:45.