UMngqithi uyibona isazodonsa kanzima iSundowns

Senzo Sokhela

UBONA isazodonsa kanzima iMamelodi Sundowns uManqoba "TV" Mngqithi ololonga iLamontville Golden Arrows, ohlale iminyaka kuyona iDowns esethimbeni layo labaqeqeshi, wabuye wayiqeqesha.

I-Arrows iguqise iDowns ngo-1-0 wegoli likaJunior Dion koweBetway Premiership ngoLwesithathu ntambama eKing Zwelithini Stadium, eMlazi.

IDowns iyiqale ngendlela engajwayelekile le sizini njengoba seyihlulwe kanye, yadlala ngokulingana kwemithathu, yanqoba emidlalweni ewu-5 kwewu-9 esayidlalile.

 Ukuqala ngalolu hlobo sekwenze abathandi bebhola bakungabaza ukuthi izosivikela isicoco sayo seligi ngaphansi kobuholi bukaMiguel Cardoso.

NGU-JAYDEN Adams weDowns ebukela ozakwabo, u-Aubrey Modiba noKeanu Cupido beshikiliswa nguSiyanda Ndlovu we-Arrows.

ISITHOMBE NGABE: BACKPAGEPIX

Le kilabhu seyinqobe iligi amahlandla awu-8 kulandelana.

UMngqithi uthi uyibona isazodonsa kanzima iDowns.

"ISundowns iyikilabhu enkulu, lokho ngeke sizikhohlise ngakho. Ngihlalile kuyona, ngiyayibonga ngengenzele khona nomndeni wami.

"Kodwa yona isazodonsa kanzima ngale sizini. Okungenza ngisho lokho wukuthi kayizange ibe naso isikhathi esanele sokulungiselela ukuqala kwesizini, lokho kuyayishaya futhi kuyabonakala nasemdlalweni wayo.

"Ukudlala iFifa Club World Cup kuyimunce omuningi umsoco. Nginesiqiniseko sokuthi ngokuhamba kwesikhathi izobuyela esimeni, kodwa ngeke kube yinto yamanje, isazodonsa kanzima," kusho uMngqithi.