Ezifingqiwe

01

NGUMNU Julius Mkhwanazi oyiphini lomphathi wamaPhoyisa kaMasipala waseKurhuleni, nosomabhizinisi uMnu Vusimzi "Cat"Matlala.

IPHINI lomphathi wamaPhoyisa kuMasipala waseKurhuleni, uMnu Julius Mkhwanazi, elisolwa ngokugunyaza ukufakwa kwamala-mbu aluhlaza izimoto zikasomabhizinisi oboshiwe uVusimuzi "Cat" Matlala, selifake isicelo sokunikwa ikhefu eliyisipesheli.

UMkhwanazi usohlwini lwabazovela, futhi bafakaze kuKhomishana yeJaji uMbuyiseli Madlanga, eqhubekayo eBrigette Mabandla Justice College, ePretoria. UMkhwanazi kuthiwa usondelene noMatlala, kanti kuthiwa ubungani babo busingethwe yinkohlakalo, kanti yena uyakuphika lokho.

02

UMENGAMELI Cyril Ramaphosa naye angase abizwe ukuthi ayokwethula ubufakazi kwiKhomishini kaJudge Mbuyiseli Madlanga, ehleli ePretoria.

UMkhuzi wamaphoyisa kuzwelonke, uGeneral Fannie Masemola, osebethulile ubufakazi kule khomishini, uthi wamtshela umengameli ngokuhlakazwa kwePolitical Killings Task Team (PKTT). UMasemola uthi incwadi eyayikhipha umyalelo wokuthi iPKTT, ayihlakazwe, yasayinwa mhla ka-31 kuDecember ngo-2024.

Uthi ungqongqoshe wamaphoyisa osamisiwe, uMnu Senzo Mchunu, wagxambukela emsebenzini wakhe, ngoba enezinhloso zokuvikela usomabhizinisi uVusimuzi "Cat" Matlala, osaboshiwe.

Phakathi kwabantu abazobizwa bazokwethula ubufakazi, nguyena uMchunu, nguMnu Oupa "Brown" Mogotsi, yilungu Democratic Alliance, ePhalamende, uNkk Diane Kohler-Barnard, noMnu Fiedel Adams, weNational Coloured Congress.

03

OCHWEPHESHE abenza ucwaningo nababamba izinyoka, sebenxuse abantu ukuthi baqaphele njengoba sanda isibalo sezinyoka eziyingozi, ezibonakala ezindaweni ezahlukene eThekwini.

UMnu Warren Dick, ozinze eBluff, eThekwini, uthi usebizwe emizini eminingi, kuthiwa makayobamba izinyoka ezinhlobonhlobo, ezinye zazo eziyingozi njengezimamba.

Uthi okwenza izinyoka zande futhi zicanase, wukuthi selethwese ihlobo, kanti ezinye izingxenye zeTheku, ziseduze namapaki namahlathi. Uthi useke wabizwa nasemahhovisi asedolobheni eThekwini, kuthiwa makayosusa izinyoka ezibonakala khona.

04

UMNYANGO wezemiSebenzi yoMphakathi neNgqalasizinda, KwaZulu-Natal, uthi usukhokhe imali engaphezu kuka-R1 billion, ukhokhela osonkontileka obubakweleta.

Ungonqqoshe walo mnyango, uMnu Martin Meyer, uthi ngesikhathi ethatha izintambo ngonyaka odlule, lab' osonkontileka bebevele bekweletwa. Uthi babe sebeqala uphenyo ngenkohlakalo ebikhona kulo mnyango, okuyikho okwenze lab' osonkontileka, bangakhokhelwa.

Umnyango kaMeyer uhlonze inqwaba yamabhilidi abengasetshenziswa, kodwa abeqhubeka nokukhokhelwa wuhulumeni. UMeyer uthi bakhona abantu abazoboshwa ngoba bayanukeka enkohlakalweni, okubalwa kubona izisebenzi, izikhulu zomnyango, nosonkontileka.