Siyazishwashwatha

KWALE noma esezama ukusebenzisa isandla uSeol Young-Woo weSouth Korea, obukelwa nguzakwabo uLee Han-beom "enwetshwa" nguThapelo Maseko weBafana.

ISITHOMBE NGABE: BACKPAGEPIX

UVULELE isibhaxu somlomo kwabebegxeka iBafana Bafana uThapelo Maseko, obeyiqhawe eshayela elakuleli igoli linqoba iSouth Korea ngo-1-0 emdlalweni wokusonga u-group A emqhudelwaneni weNdebe yoMhlaba yeFifa oqhubeka eMexico, eCanada nase-United States of America (USA).

Lo mphumela uwelisele iBafana kwi-last 32 ezobhekana kusona neCanada ngeSonto ngo-21h00 eLos Angeles, e-USA. 

Leli goli lijabulise abalandeli beBafana kwazise leli qembu beliqala ukudlulela esigabeni somkhumulajezi.

UMaseko uthe kubalulekile ukuthi abalandeli bawujabulele lo mphumela. Uthe ujabule ngaleli goli alishayile, eliqophele elakuleli umlando.

Uthe okumjabulisayo wukuthi lo mphumela ubuyisele kwasifuba amathe kwabanye abalandeli abakhwele badilika kubona emuva komdlalo wokuqala, bebagxeka sengathi benza ngamabomu ukwehlulwa yiMexico.

Uthe bazimisele ngokusebenzisa lo mphumela ukuzigqugquzela uma sebebhekene neCanada.

WEXWAYISE abadlali beBafana Bafana ngobungozi okufanele babulindele uma sebebhekene neCanada koweLast 32 yeNdebe yoMhlaba yeFifa ngeSonto ngo-21h00 e-USA, uSiphiwe "Shabba" Tshabalala (osesithombeni), owazakhela udumo eshayela iBafana igoli lokuvula emqhudelwaneni owawuseNingizimu Afrika ngo-2010.

Uthe kufanele bazibambe ziqine ngoba iCanada ingelinye lamazwe adlala ibhola elisezingeni eliphezulu kulo mqhudelwano. Nokho uthe leli yithuba elikahle lokuthi abadlali beBafana bazibonakalise ebholeni lomhlaba.

Uncome ukuvuthwa okukhonjiswe ngelakuleli liguqisa iKorea.

Uthe uthole nethuba lokuqinisa idolo uHugo Broos ocija iBafana, emazisa ukuthi baleseka ngokugcwele leli qembu bengabadlali balo abadala.

NGU-HUGO Broos ongumqeqeshi weBafana ejabula nonozinti wakhe, uRonwen Williams.

ISITHOMBE NGABE: BACKPAGEPIX

UCISHE waqulekiswa wukuminca uHugo Broos ongumqeqeshi weBafana Bafana edlulele kwiLast 32 yeNdebe yoMhlaba yeFifa, ihlula iSouth Korea ngo-1-0 wegoli likaThapelo Maseko ngovivi lwangoLwesine eMonterrey Stadium, eMexico.

Isizodlala neCanada ngeSonto ngo-21h00 e-USA.
Emuva kwalo mdlalo uBroos uthe imizuzu ewu-20 yokugcina yalo mdlalo imethwese obukhulu ubunzima njengoba inhliziyo ibisisho ukuphuma ngomlomo.

Uthe elakuleli linele lashaya igoli, wavele wafisa ukuba unondweba awuqede lo mdlalo ngendlela abesebambe ngakhona umoya, ikakhulukazi uma ibhola liya ngasemapalini eBafana.

NGUMQEQESHI weSouth Korea, uHong Myung-bo esukumisa umdlali wakhe, uSeol Young-woo.

ISITHOMBE NGABE: BACKPAGEPIX

UMQEQESHI weSouth Korea, uHong Myung-bo, ushaywe yizinduku zakhe beguqiswa yiBafana Bafana ngo-1-0 kowokusonga uGroup A kwiNdebe yoMhlaba yeFifa.

Lo mqeqeshi uthi ubeyifihlele induku emqubeni iBafana ngokuqalisa ebhentshini uSon Heung-min onejubane elikhulu.

Uthe inhloso bekuwukumfaka uma iBafana seyikhombisa ukukhathala, ukuze ayigadulise kahle, kanti akabuzanga elangeni, izovele ithole igoli kuqala.

Uthe kuthe noma esemfaka uSon Heung-min, kwanhlanga zimuka nomoya njengoba iBafana ibisiyala ukhasha emuva. Uthe bekufanele benze kangcono kulo mdlalo.

ISouth Korea silobe isamincile ukudlulela ku-last 32 njengoba iqede ilele isithathu ngamaphuzu amathathu kuleli qoqo elinqotshwe yiMexico ngamaphuzu awu-9, kwalandela iBafana ngamane, kwathi iCzechia yabamba ibhuleki ngelilodwa.