Seyicela imithandazo yabalandeli iBafana

NGABADLALI beBafana Bafana emuva kokuhlula iSouth Korea ngo-1-0 kowendebe yomhlaba.

ISITHOMBE NGABE: BACKPAGEPIX

Mfanafuthi Ndlovu
 
UBONGE ukwesekwa abakuthola kubathandi bakanobhutshuzwayo baseNingizimu Afrika uRonwen Williams ongukaputeni weBafana Bafana edlulele kwiLast 32 yeNdebe yoMhlaba yeFifa eqhubeka eCanada, eMexico nase-United States of America (USA).

IBafana izogadulisana neCanada kowe-last 32 ngeSonto ngo-21h00 eLos Angeles, e-USA.

Elakuleli liyaqala ukufinyelela esigabeni somkhumulajezi njengoba belihlala liphuma kwesamaqoqo phambilini, okuyinto eyenzeke ngo-1998 eFrance, ngo-2022 eKorea/Japan naseNingizimu Afrika ngo-2010.

Ekhuluma emuva kokuba iBafana ihlule iSouth Korea ngo-1-0 kowokusonga u-group A entathakusa yangoLwesine eMonterrey Stadium, eMexico, uWilliams uthe bajabule kakhulu ngalo mlando abawuqophile.

Uthe baye kulo mdlalo ngenhloso yokuphakamisa ifulegi lakuleli kulo mqhudelwano.

NGABADLALI beBafana Bafana emuva kokuhlula iSouth Korea ngo-1-0 kowendebe yomhlaba.

ISITHOMBE NGABE: BACKPAGEPIX

Emdlalweni neSouth Korea, elakuleli linqobe ngegoli eliqotshelwe enethini nguThapelo Maseko ngomzuzu ka-64.

UMaseko uqokwe njengomdlali wosuku.

"Nakuba siyeke amathuba amaningi kulo mdlalo, kodwa sinethemba lokuthi koweCanada sizokwazi ukuwasebenzisa ngendlela wonke esizowakha.

"Ukubambisana enginakho nezitobha kusezingeni eliphezulu, sixhumana kahle, futhi siyazana ubuthaka bethu, okwenza sisizane kalula.

"Sidinga imithandazo yabalandeli ukukwazi ukumelana nengcindezi esizohlangabezana nayo koweCanada," kusho uWilliams.