Amaphoyisa azobambisana nezinkampani ezizimele zonogada, ukuqapha isimo ngomhla ka-30

Thandoluhle Ngubo

AZOQINISA ithimba lezokuphepha ngokusebenzisana nezinkampani zonogada ezizimele ngomhla ka-30 June, amaphoyisa akuleli.

Lokhu kuvezwe nguMkhuzi wamaPhoyisa obambile, uJenene Puleng Dimpane.

UJenene Dimpane uhlangane nezikhulu zezinkampani ezizimele nenhlangano ebhekelele ukusebenza konogada, iPrivate Security Industry Regulatory Authority (Psira), kudingidwa uhlelo lokusebenzisana.

Ngalolu suku kulindeleke ukuba izakhamizi zakuleli zibhikishe, ngenhloso yokuxosha abokufika abakuleli ngokungemthetho.

Uthi inhloso yokusebenzisana, kungeminye yemizamo yokuthi umhla ka-30 ungaphendu- ki ufane nosuku lwezibhelu zikaJuly ngo-2021.

Uthi zingaphezulu kuka-300 izinkampani zonogada ezizimele, ezizoba yingxenye yalokhu kubambisana.

"Izibhelu zango-2021, zaveza ukuthi likhulu igebe ekuhleleni, isekuxhumaneni nasekuse- benzisaneni phakathi kwezinhlaka ezibhekelele ukuphepha nokuvikeleka komphakathi kuleli.

"Esikufisayo wukuthi kungabikhona uhlaka oluzozwa umthwalo omkhulu lodwa," kusho uJenene Dimpane.

Kulokhu kubambisana, izinkampani zonogada zizolekelela ngokuhlinzeka ngezobunhloli, amabhanoyi, izimoto nonogada abazoqapha isimo.

Kulindeleke ukuba bacele ku-500 000 onogada abazobe besebenza ngomhla ka-30.

Kuthiwa zonke izinkampani zonogada zizobe zihambisana nomthetho

I-Psira inxuse zonke izinkampani zonogada ezizimele ukuba zisebenze ngokuzikhandla.

Ithi izokwenza imizamo yokuqinisekisa ukuthi zonke izinkampani zonogada ziyahambisana nomthetho.

Ikhathazekile ngezinsolo zokuthi kukhona izinkampani eziqasha abokufika abakuleli ngokungemthetho, nalabo abangenawo amaphepha abagunyaza ukuba basebenze kuleli.

Isikhulu esiphezulu senkampani yonogada iFidelity Group, uMnu Wahl Bartmann, sithi beyizinkampani ezizimele babuyekeze izibhelu zika-2021.

"Ngicabanga ukuthi lolu bambiswano luyinto enhle kakhulu. Safunda isifundo ngo-2021. Ukuhlangana kwethu ngalolu hlobo, kukhombisa ukuthi silungiselele noma ngabe yini engenzeka ngalolu suku.

Njengezinkampani ezizimele, sizolekelela amaphoyisa ngonogada abazohamba phansi nabazoqapha isimo behamba emoyeni ngamabhanoyi. Sizophinde silekelele ngezobunhloli, sivikele imiphakathi namabhizinisi," esho.

Isikhulu esiphezulu sakwaBidvest Protea Coin, uMnu Waal De Waal, uthi bazoqinisekisa ukuthi basebenzisana ngokubambisana.

Uthi kabamelene nokuthi izakhamizi zakuleli zibhikishe, kodwa bafuna lokhu kwenziwe ngokuthula.