Kushintshe izinhlelo zomjaho ngomcimbi kamaskandi

IHollywoodbets 10km isizogijinywa ngaphambi kokuqala kweMpucuzeko Maskandi Festival

Mzwamandla Zondi

SEKUNOGUQUKO olumqoka ngomjaho obhekwe ngabomvu iHollywoodbets Durban 10km njengoba sewusondezwe ukuba ugijinywe ngoMgqibelo womhla ka-30 kuNcwaba (August) esikhundleni sangeSonto mhla ka-31.

IHollywood Athletics Club ikhiphe isitatimende iqinisekisa ukuthi umjaho wabo sewuzokuba ngoMgqibelo.

Ngesikhathi kwethulwa lo mjaho, abadidiyeli bawo batshela abezindaba ukuthi balindele abasubathi abawu-10 000, bathi kwasekubhaliswe abawu-5000.

Njengokwejwayelekile, nakulo nyaka kulindelwe izinkumbi emcimbini weMpucuzeko Maskandi Festival, eThekwini.

ILANGA Lempelasonto lithole ukuthi okuholele ekutheni kushintshe usuku lomjaho wukuthi kuzokuba neMpucuzeko Maskandi Festival ngoMgqibelo ePeople's Park, ezodonsa kuze kube yiSonto ekuseni, obekuzokwenza kube nzima ukuthi amaphoyisa akwazi ukuvala umzila okuzogijinywa kuyona ngesikhathi.

Abathandi beMpucuzeko bahlala ePeople's Park kuze kuyolamula ukusa kwangeSonto minyaka yonke.
Umjaho walo nyaka uzophelela eHollywoodbets Kingsmead Cricket Stadium, kanti phambilini ubusongwa eKings Park Outer Fields.

Kuthiwa izinombolo zizoqala ukulandwa ngoLwesithathu kuze kube wuLwesihlanu phakathi kuka-10 ekuseni no-18h00 ntambama, eKingsmead Stadium.

USTEPHEN Mokoka weHollywoodbets AC ungomunye wababhekwe ukwenza kahle kwiHollywoodbets Durban 10km.

Lo mjaho ukhokha ukuyedlula yonke eyaleli banga lika-10km eNingizimu Afrika njengoba izingqwele zizohlomula ngo-R37 500 ngokwahlukana kobulili.

Imingenelo isavuliwe kanti abafuna ukubhalisa bangangena kwi-website ethi: www.webtickets.co.za noma baye ezitolo zakwaPick 'n Pay kulo lonke elakuleli.

Kulo mjaho kubhekwe ukuba abasubathi bale kilabhu baqinisekise ukuthi umklomelo usala ekhaya. Phakathi kwabasubathi beHollywood AC abathwelwe ngeqoma ukwenza kahle kukhona uStephen Mokoka, uTayla Kavanagh, uRutendo Nyahora, uNeheng Khatala, ukubala nje abambalwa.