Uthembisa lukhulu omele iKZN kowokuklwebha amathayi

Lucky Cain

KUMFUNDISE ukuba ngumakhenikha ukudlala ngezimoto uSphesihle Ndlovu (26) ozobe emele iKwaZulu-Natal emncintiswaneni weRed Bull Shay'imoto, ozobe wenzeka okokuqala eThekwini ngomhla ka-10 ku-Agasti, eSuncoast Casino eNorth Beach.

UNdlovu odabuka eNewcastle, uthi uqale eneminyaka ewu-14 ukuba nothando lokudlala ngezimoto, ebukela abakhulile kunaye ngakubo, ngaphambi kokuba adlulele esigabeni sokuqala ukuba azibambele mathupha esitelingini.

Uthe uthando lumenze waba nentshisekelo yokufunda kabanzi ngokudlalisa imoto, aklwebhe namathayi, kwabe sekuwungena kwakhe kulo mkhakha.

Uthe kule minyaka engenile usekwazile ukuhambela amadolobha ahlukene, edlala ngemoto yakhe yohlobo lwe-BMW 325, oludume ngele-gusheshe.

Uthe enye ingqinamba abehlangabezana nayo, wukufa kwemoto yakhe obekuphoqa ukuba akhiphe ephaketheni lakhe njengoba enganabo abaxhasi.

"Ukuthenga izinto zokulungisa imoto uphinde uqashe umakhenikha, bekungidla kakhulu ephaketheni kangangokuba kwesinye isikhathi imoto ibike ihlale isikhathi ukuze ngithole imali yokuyikhanda," kusho uNdlovu.

Usebenza ngokugcwele enkampanini yokungcwaba. Uthe ngenxa yalokhu kwamphoqa ukuba agcine efunda ukuzikhandela imoto ukuze akwazi ukonga.

"Ngingasho ukuthi ukufunda ukuzikhandela imoto yami kwangibuyisa ngokugcwele ekubeni ngiqale ngihambele imncinitiswano eyahlukene. Uyabona manje akusekho okungihlulayo ngemoto, sengazi konke okumele ngikwazi ukuze ngingazitholi sengilinde umuntu ozongikhokhisa," kusho yena.

Uthi uyafisa ukuthi kulo mdlalo wezimoto bande abaxhasi ukuze ukwazi ukuthuthuka.

Kuzokhumbuleka ukuthi ngesikhathi uNgqongqoshe wezemidlalo uMnu Gayton Mckenzie, engena esikhundleni enye yezinto azibeka eqhulwini kwaba yiwona lo mdlalo.

UNdlovu uthe unethemba lokuthi ungqongqoshe uzowamela amagama akhe ukuze akwazi ukugcina eseziphilisa ngalo mdlalo azifelayo ngawo.

Uthembise ukwenza ezibukwayo emnncintiswaneni weRed Bull Shay'imoto, njengoba ezobe ethwele isifundazwe emahlombe akhe.

"Abantu abalindele izimanga ezinkulu ngoba ngizilungiselele, futhi ngifuna ukubuya naso isicoco sikanombolo 1," kusho yena.