Kungene abaxhasi abamqoka emjahweni wabesifazane

Injabulo iTotalsports Women's Race
isayina isivumelwano seminyaka
emithathu nabakwa-Absa

Mzwamandla Zondi

ITOTALSPORTS Women's Race (TWR) isayine isivumelwano seminyaka emithathu nabakwa-Absa. I-TWR inemijaho emithathu yabesifazane egijinywa emadolobheni amakhulu kuleli.

Umjaho wokuqala uzokuba seThekwini ngeSonto lomhla ka-2 ku-August, ulandelwe ngozokuba mhla ka-9 eCape Town, kuvale owaseGoli ongomhla ka-16 kuwo u-August. Abakwa-Absa bajoyina lo mjaho nje, banemijaho yabo i-Absa Run Your City 10k esizakhele elikhulu igama kwezokugijima eNingizimu Afrika.

UMichael Meyer oyiManaging Director yakwaStillwater Sports, okuyiyona esabalalisa lo mjaho, uthe bajabule ngokungena ebudlelwaneni nabakwa-Absa.

"Kuyizindaba ezimnandi kithina njengoba sizongena enyangeni yabesifazane, u-August. I-TWR ngeyokugqugquzela abantu besifazane ukuba babe yinto eyodwa," kusho uMeyer.

UNikki oyiHead of Marketing kwaTotalsports, uthe ujabule ngalesi sivumelwano. Uthe sihlanganisa izinkampani ezimbili ezinombono owodwa, wokukhulisa abantu besifazane.

UJabulile Sibanyoni wakwa-Absa, uthe iTWR kayiwona nje umjaho wabesifazane, ngeyokubabungaza nokubagqugquzela ukuba balethe ushintsho emindenini yabo, emisebenzini nasemphakathini.

Phakathi kwabasubathi okuthiwa bazokube beyingxenye yomjaho waseThekwini kukhona noNeheng Khatala waseLesotho osanda kungena endaweni yesihlanu kwi-Absa Run Your City Durban 10k. Umsubathi waKwaZulu-Natal osefomini kulezi zinsuku, uTayla Kavanagh uzokube engekho njengoba ekumaCommonwealth Games aqhubeka eScotland.