NGUMLINGISI uDawn Thandeka King, odlala indawo ephambili emdlalweni othi, Inyosi, kuMzansi Magic.

Lucky Cain

UGABE ngabalingisi abanohlonze umdlalo omusha kamabonakude osihloko sithi, Inyosi.

Kulindeleke ukuba uqale ukukhonjiswa ngomhla ka-2 ku-November, esiteshini esingaphansi kwe-Canal+ uMzansi Magic, Channel 161 ngo-8 kusihlwa.

Ngokusho kwesitatimende esikhishwe ngabakwa-Canal+, lo mdlalo uzobe ushubile. Kuzogqama amandla, amasiko nokuphuma kwamaqiniso ahambisana nemizwa yezinhlungu.

Phakathi kwabalingisi ozobe ugabe ngabo kubalwa, uDawn Thandeka King ozobe edlala indawo ephambili, uKhethukuthula Jele, uThembisile Matu noKwenzo Ngcobo, ukukha phezulu.

NGUTHEMBISILE Matu olingisa emdlalweni othi, Inyosi.

Ungena esikhaleni seStrings Attached,  okuwumdlalo obugabe ngabalingisi uRosemary Zimu, uMelusi Mbhele nabanye.

UZakhele Msibi uzodlala indawo kaSunday Nkabinde, okuyindawo azakhele udumo ngayo emdlalweni Isibaya, yokuba ngukhokhovula wenyanga.

Kulindeleke ukuthi lo mdlalo ususe ukukhuluma kubabukeli, njengoba uzongena nasendabeni ehlale isematheni, yokuthwala.

UMabongi olingiswa nguDawn Thandeka King, uzimisele ukwenza konke okusemandleni ukugwema ukuhlupheka okugcina kuholela ekutheni athathe izinqumo ezinqala ngempumelelo yomndeni wakhe.