Mfanafuthi Ndlovu

BAHLELA ukunika uMengameli wamaZulu FC, uSandile Zungu isipho esikhethekile uma sekusongwa isizini ka-2024/2025 abadlali bale kilabhu ezoshukana ne-Orlando Pirates koweBetway Premiership ngoMgqibelo ngo-15h00 eMoses Mabhida Stadium, eThekwini.

Nakuba uSuthu selungenile kwi-top 8 kodwa sekusele ukuba lulwele indawo engcono, ezokwenza lugweme amakilabhu anzima - azoqeda ekwi-top 3 - kwiMTN8 yangesizini ezayo, okubalwa kuwona iPirates neMamelodi Sundowns.

Le kilabhu isethubeni elihle lokugoqa isizini ibambe unombolo 5 uma inqoba iBucs, kwazise iTS Galaxy ehleli kule ndawo seyiqedile ukugijima imidlalo yayo kule sizini.

Enye ikilabhu esenethuba lokuqeda kunombolo 5 yiPolokwane City eqhathwe neKaizer Chiefs edinga amaphuzu amathathu ukuqinisekisa indawo kwi-top 8 njengoba ihleli kunombolo 9 njengamanje.
Umdlalo weChiefs nePolokwane ungoMgqibelo ngo-15h00 eFNB Stadium, eGoli.

URichard Ofori ongunozinti wokuqina woSuthu, uthi bafuna ukufeza izimfuno zabaphathi ngokuqeda endaweni ehloniphekile njengoba sebephakathi kwi-top 8.

UZungu uhlezi ekugcizelela ukuthi ufuna ezakhe zigijime kuyona yonke imiqhudelwano edlalelwayo kwiPremier Soccer League (PSL), futhi zilwele nokuyinqoba.

"Kumqoka ukuthi imiqondo yethu siyigxilise kulo mdlalo kusuka umdlalo uqala kuze kube uyaphela ukuthola umphumela esiwudingayo," kusho u-Ofori.
Amathikithi alo mdlalo abiza uR80 eTicketPro.

NGUSANDILE Zungu ongumengameli wamaZulu FC.

ISITHOMBE NGABE: BACKPAGEPIX

Kubadlali ababhekiwe ukutholela uSuthu amaphuzu agcwele, kukhona u-Ethan Brooks, uTshepang Moremi noBongani "Ben 10" Zungu ofike nozinzo enkabeni yesisu.

KwiPirates kukhona uRelebohile Mofokeng obedonsa isigwebo emdlalweni odlule, uMohau Nkota noDeon Hotto.

* Kuhlelwe isitimela esizosuka ngo-12 eMlazi sifike ngo-13h00 enkundleni kwabayobuka lo mdlalo.
Uhambo luwu-R20 ukuya nokubuya.

Isiyonke imidlalo yeBetway Premiership kule mpelasonto imi kanje:
NGOMGQIBELO
EMoses Mabhida: AmaZulu vs Orlando Pirates 15h00.
E-DHL Cape Town Stadium: Cape Town City vs Stellenbosch 15h00.
EPrincess Magogo: Golden Arrows vs Sekhukhune United 15h00.
E-FNB Stadium: Kaizer Chiefs vs Polokwane City 15h00.
ESeshego Stadium: Magesi vs Marumo Gallants 15h00.
EPeter Mokaba: SuperSport United vs Richards Bay 15h00.