NGUMQEQESHI weSekhukhune United u-Eric Tinkler.

I-TS Galaxy nomyalezo oshubile kumaZulu FC

Mfanafuthi Ndlovu

UZOLUNGISA amaphutha nge-Orlando Pirates umqeqeshi weSekhukhune United uma la makilabhu esebhekene koweBetway Premiership ngoMgqibelo ngo-15h30 ePeter Mokaba Stadium, ePolokwane.

U-Eric Tinkler opheka iSekhukhune, uthi akazimisele ngokukhubeka imidlalo ilandelana njengoba ethole isibhaxu kwiStellenbosch FC, ebahlule ngo-1-0 wegoli likaTshegofatso Mabasa ngoLwesithathu, khona belu ePolokwane. Lo mphumela ubemuhle kuGavin Hunt ongumqeqeshi omusha weStellies.

KUBHEKWE uphinde ushube kanje umbango kuBradley Grobler weSekhukhune noSipho Mbule we-Orlando Pirates. Obukeleyo nguNkosinathi Sibisi weBucs.

Ekhuluma naleli phephandaba uTinkler, uthe unesiqiniseko sokuthi abadlali bakhe bazovuka bazithathe. Uthe leli yithuba lokuthi abadlali bakhe bageze igama lekilabhu ngokushaya iPirates, kumnyama kubomvu. Nokho uthi wazi kahle ukuthi iPirates izokuba yingozi njengoba ilwela ukubuyela esicongweni esuke kusona iMamelodi Sundowns inqoba i-Orbit College ngo-2-0 kowokuvula lo nyaka.

"Kangidingi ukugqugquzela abadlali ngalo mdlalo wePirates. Ngazi kahle ukuthi ngeke kube wumdlalo olula. Emdlalweni odlule senze amaphutha amaningi awubungane, okungamele siwaphinde," esho.

Uthe okuhle wukuthi akekho umdlali othintekile, bonke bawulungele lo mdlalo.

* Kuzo ezeBetway Premiership, AmaZulu FC azoshukana neTS Galaxy ngeSonto ngo-15h30 eMoses Mabhida Stadium, eThekwini. Amathikithi alo mdlalo aseyatholakala eTicketPro kanti libiza u-R60 lilinye. Kubhekwe ukuba uSuthu luzibambe ziqine uma lufuna ukuvula kahle unyaka ngoba iGalaxy ijwayele ukulunika izinkinga.

IGalaxy ithumele umyalezo oshubile oSuthwini inqoba iMarumo Gallants ngo-2-0 koweligi ngoLwesithathu eMbombela Stadium, eMpumalanga.

UZOGXUMA kanje umlandeli wokuqina woSuthu uDlamini uma ezakhe ziphumelela ukubuyisa izinduku kwiTS Galaxy.

* Isiyonke imidlalo yePremiership imi kanje:
NGOLWESIHLANU
ERichards Bay Stadium: Richards Bay vs Siwelele 19h30.
NGOMGQIBELO
E-Olympia Park: Orbit College vs Chippa United 15h30.
EPeter Mokaba: Sekhukhune United vs Orlando Pirates 15h30.
NGESONTO
Moses Mabhida Stadium: AmaZulu FC vs TS Galaxy 15h30.
EChatsworth Stadium: Durban City vs Polokwane City 18h00.