IDowns neqhinga lokubuya nendebe yeCaf

NGABADLALI beDowns bejabulela igoli lika-Aubrey Modiba alishaye le kilabhu ihlula i-AS FAR Rabat yaseMorocco emlenzeni wokuqala weFinal yeCaf Champions League.

ISITHOMBE NGABE: BACKPAGEPIX

Senzo Sokhela
 
IBHEKE ukusetshenzelwa ngekwenze kusakhaya iMamelodi Sundowns uma seyidlala umlenze wesibili wamanqamu weCaf Champions League ne-AS FAR Rabat yaseMorocco.

Lo mdlalo uzokuba ngeSonto ngo-21h00 eMorocco.

IDowns iya kulo mdlalo nje, ihamba phambili ngo-1-0 wegoli lika-Aubrey Modiba, alishaye emlenzeni wokuqala obungeledlule eLoftus Stadium, ePitoli.

Ngendlela lo mdlalo olindelwe ngayo eMorocco, kuthiwa amathikithi awo aphele kunemizuzu embalwa kumenyezelwe ukuthi ayadayiswa, ngeledlule.

NGUMODIBA edukiswa nguReda Slim weRabat.

UModiba uthi ingcindezi ebhekene nezitha zabo njengoba zizoqala umdlalo zilandela ngemuva, yiyona ezobasebenzela ukuzincisha umoya ngokuthi bandise isibalo samagoli ukuze zixhamazele.

"Okokuqala nje, yibona abanengcindezi njengoba sihamba phambili ngo-1-0. Bazoqala umdlalo benexhala lokuthola igoli ngokushesha. Lokho nje kukodwa, kuzobadalela inkinga ngoba kwathina siwuhlomele lo mdlalo.

"Ngaphandle kwalokho, uma sidlala ekuhambeni, yilapho esinamandla khona ngoba kasibi nalo uvalo.

"Nalokho kuzoselekelela ukunqoba lo mdlalo. Siyolwa kulo mdlalo, futhi sibulindele ubunzima," kusho uModiba.