KUSUKA kwesobunxele; nguHalalisani Vilakazi we-Orbit College, nguRelebohile Mofokeng oxinwe nguSiphesihle Ndlovu weKaizer Chiefs, no-Abdeslam Ouaddou ongumqeqeshi weBucs. 

IZITHOMBE NGABE: BACKPAGEPIX

Senzo Sokhela
 
UKHATHAZEKILE ngesihluku athi sibhekiswa kubadlali bakhe umqeqeshi we-Orlando Pirates, u-Abdeslam Ouaddou, njengoba ezakhe zibhekene nomdlalo onzima.

IBucs izodlala ne-Orbit College kowokusonga iBetway Premiership ngoMgqibelo ngo-15h00 eMbombela Stadium, eMpumalanga.

Idinga ukuwunqoba lo mdlalo ukuze igcotshwe njengezingqwele zeligi, kanti ne-Orbit idinga amaphuzu amathathu njengoba ilwela ukusinda ezembeni.

U-Ouaddou uzwakalise ukukhathazeka ngesihluku esenziwa yizimbangi kubadlali bakhe, athi zivele zibadlalise kabi ngenhloso yokubephula.

ISIPILIYONI sikaBen Motshwari (okwesobunxele) noRamahlwe Mphahlele (okwesokudla) be-Orbit College, sizodingeka uma le kilabhu isibhekene nePirates.

IZITHOMBE NGABE: BACKPAGEPIX

Uthe amanye amakilabhu asebenzisa amasu okukhahlela abadlali bakhe ukuze baphume emdlalweni, bangabe besakwazi ukudlala ibhola ngendlela.

"Kunomehluko phakathi kokudlalisa umuntu kabi ngenhloso yokunqoba ibhola nokumudlalisa kabi ngenhloso yokumephula. Okwenziwa kubadlali bami, uyabona nje ukuthi inhloso wukubephula.

"Kufanele bavikelwe abadlali bami ngoba iyangikhathaza le nto. Lokhu sikulindele nakulo mdlalo ukuthi kuzokwenzeka into ebafanayo.

"Kuzofanele sisebenzise ubuhlakani uma sifuna ukuwunqoba lo mdlalo," kusho u-Ouaddou.

Isiyonke imidlalo yeBetway Premiership yokusonga isizini ka-2025/26 imi kanjena:-
NGOMGQIBELO
EChatsworth Stadium: Durban City vs AmaZulu 15h00.
EKing Zwelithini Stadium: Golden Arrows vs TS Galaxy 15h00.
EMoses Mabhida Stadium: Kaizer Chiefs vs Chippa United 15h00.
ESeshego Stadium: Magesi vs Richards Bay 15h00.
EDr Petrus Molemela Stadium: Marumo Gallants vs Stellenbosch 15h00.
EMbombela Stadium: Orbit College vs Orlando Pirates 15h00.
EPeter Mokaba Stadium: Sekhukhune United vs Siwelele 15h00.