Ubegwajaza enkantolo umvangeli wamaNazaretha othweswe elokunukubeza owesilisa

Thokozani Ndlovu

UBEGWAJAZA umvangeli (58) weBandla lamaNazaretha - ohlangothi lwaseBuhleni -  obevele eNkantolo yeMantshi yaseNtuzuma ngoLwesithathu, othwese icala lokunukubeza ngokocansi owesilisa (18) oyilungu lebandla.

Ummangalelwa ubhekene necala lokunukubeza isisulu (esiligodlile igama laso) esingumsakazi wesiteshi somphakathi eThekwini. Iphephandaba liligodlile igama likammangalelwa, ngenxa yezizathu zomthetho.

ILANGA Lempelasonto lizibonele umvangeli ehleli ebheke phansi, engafuni amehlo akhe ahlangane nawabantu, waze wabizwa ukuba ayongena ebhokisini.

Nangesikhathi esephuma, ubehamba nedlanzana labesifazane - okukholakala ukuthi bangamalungu omndeni wakhe - abebemngungile, waze wayophuma ngesango enkantolo.

Icala lakhe lihlehlele umhla ka-30 kuJune.

Inkantolo iveze ukuthi kusaqhubeka uphenyo njengoba kunesitatimende esisalindiwe, okumele senziwe ngumuntu wokuqala owabikelwa yisisulu ngesikhathi siphuma ngejubane edokodweni likamvangeli, ngosuku esithi sanukubezwa ngalo.

Isisulu sifike enkantolo sihamba nonogada. Sithe sebehlala besiqaphile ngenxa yokuthi sesaba ukuthi singahlaselwa.

Umvangeli uthweswa leli cala nje, kuthiwa wabizela isisulu edokodweni lakhe beseBuhleni, eMzinyathi, eNanda, ngesikhathi kubuywa entabeni engcwele ngoJanuary, nonyaka.

Kuthiwa wayethe singaya sizogeza edokodweni lakhe uma singenawo amanzi kwelaso. Kuvela ukuthi sakuthakasela lokho ngoba sasifuna uku-charger amaselula aso ne-laptop, kwazise idokodo likamvangeli linogesi.

Embikweni odlule weLANGA - elinguzakwabo waleli phephandaba - kwavela ukuthi sathi sesikhumulile sigeza endishini, sabona umvangeli eseguqe phambi kwaso, wasibamba ubuntu baso, wabuphosa emlonyeni wakhe.

Kulapho kuthiwa sagxuma, saphuma endishini, sagqoka isikhindi, sabuza umvangeli ukuthi yini le nto ayenzayo.

Kuthiwa isisulu saphuma sayobikela abashumayeli ababekwamanye amadokodo aseduze, kwagcina kuvulwe icala.