Ibe 
nezinguquko ezingatheni 
i-Renault Duster

BABUGWEMILE ubulivilivi nobuchwepheshe obuyihaba ngemoto entsha yabo abakwa-Renault.

I-Duster entsha ayizukumxina ngobuchwepheshe obutheni umshayeli, njengoba iza nezinguquko ezingatheni uma uyiqhathanisa nencintisana nazo.

Lokhu kuvele esithangamini sokuthulwa kweDuster New-Generation ewuhlobo lwe-SUV, eKapa ngeledlule, lapho izintatheli zithole ithuba lokuyishayela kusukela esikhumulweni sezindiza saseKapa, kwadlulelwa ezintabeni zase-Highlands, kwaze kwayothiwa cababa edolobheni elicane laseHermanus.

Nakuba lolu hobo olusha lweDuster lwakheke ngesitayela sesimanje ngaphandle, ubuchwepheshe obuthe thuthu neminye imixhantela yezokuphepha, isafana nje
neye-SUV ejwayelekile.

Isikhulu esiphezulu (CEO), sakwaRenault  uMnu Shumani Tshifularo, sithula inkulumo yokuvula isithangami, sithe ukwethulwa kwale Duster kusayingxenye yohambo lwabo abalubiza ngeFutuReady, abathi luyisu lokukhiqiza izimoto zabo ezintsha ngezigaba, okuqale ezinyangeni eziyisishiyagalolunye (9) ezedlule.

Uqhube ngokuthi nakuba le Duster ihamba ngophethiloli, kodwa ngonyaka ozayo bazothula uhlobo lwayo lwe-hybrid.

Bebuzwa ngokugcina le moto iyi-4x2 njengoba bekulindeleke ukuthi izonyukela ezingeni le-4x4, bathe ngokocwaningo lwabo abathandi beDuster bathakasela ukusebenza kwayo njengemoto yansukuzonke, nokukwazi ukumelana nokungcebeleka okuhlukile (adventure).

Ngiyishayele kusukela edolobheni laseKapa ngaze ngayosabalalela ngaphandle kwedolobha. Ngiyithole iyimoto enozinzo etiyeleni, kanti ayinawo umsindo ozwakala kakhulu ezimotweni ezifanele ubhuqu.

Ukuphakama iwu-212mm ukusuka phansi, okuletha umehluko omkhulu lapho uhamba obhuqwini nasematsheni.

Ngaphakathi izinguquko zibonakala ngesitayela sesimanje  kanti inemifakela eminingi, ekhombisa ukucabangela umshayeli.

Ine-screen se-infotainment esiwu-10.1-inch, kanti uyakwazi nokuyixhuma ngaphandle kokusebenzisa ikhebuli kumakhalekhukhwini wakho. Inendawo ongashaja kuyo ngaphandle kwekhebuli (wireless charging).

Ohlotsheni lweDuster olusezingeni eliphezulu, uthola nezihlalo ezineziphephethi (ventilated seats) nophahla lwengilazi oluvulekayo (panaromic roof).

Okubekwe phambili ngaleDuster, wukungabi nemicikilisho eminingi, kanti inebhuthi engamalitha awu-518, siyavuleka isikhala uma uvala izitulo zangemuva.

Uyithola ngohlobo lwamalitha awu-1.0 wenjini ye-turbo bese kuthi enamandla athe xaxa, ibe ngamalitha awu-1.3. Nayo iyi-turbo, itholakala nge-manual noma ibe ngumshini ozishintshayo (automatic).

Okunye obekungalindelekile ngamanani ayo njengoba esukela ku-R339,999 kuye
ku-R499,999, okwenza umncintiswano wezimoto zomkhakha we-SUV ube nzima kakhulu.

Ababuqhakambisi-ke ngeDuster
abakwa-Renault ubucwebecwebe obuphambili nemigilingwane eyenziwa yizimoto manje, kodwa bathi babeke phambili umshayeli ofuna imoto ezohamba kahle, ibe nokunethezeka nsukuzonke, iphinde imelane nezindlela zobhuqu zebanga elide ngaphandle kwezingqinamba.