Kuvundululwa ithalente labesifazane ngomncintiswano kamaskandi

Thandi Zondi

UMASIPALA weTheku uzoba nomncintiswano wabesifazane abasemculweni kamaskandi, ngenhloso yokugubha inyanga yabesifazane nokufukula abaculi abasafufusa.

Lo mncintiswano obizwa ngeWomen in Maskandi Festival, uzothatha izinsuku ezimbili eStable Theatre, eThekwini, kusasa ngoMgqibelo ngomhla ka-22, nangeSonto ngomhla ka-23 August, kusukela ngo-09h00 ekuseni kuya ku-16h00 ntambama.

Umasipala uthi unika ithuba abesifazane kulolu hlobo lomculo obelwaziwa njengolwabesilisa.

Umncintiswano kawuzukugcina ngabaculi kuphela, uvuleleke nasemagidangomeni,  aphakathi kweminyaka ewu-18 kuya ku-35.

Amajaji kuzobe kunguPhuzekhemisi (osesithombeni esingezansi), uBuselaphi, uTalent Mbatha noZimdollar. 

"Umculo kamaskandi ulokhu uqhubeke njalo nokuxoxa izindaba ezibalulekile, futhi unika umphakathi izwi elinamandla.

"Ngalo mkhankaso, umasipala uhlose ngawo ukugqugquzela abesifazane ukuba bangene kulolu hlobo lomculo, nokuvulela indlela abaculi abasafufusa, ukuba bathole ukunakwa namathuba emkhakheni wezikaqedisizungu," kuchaza umasipala.

UMasipala weTheku unxusa abesifazane abanothando lwalo mculo ukuba balisebenzise.

Labo abazobe beyingxenye yomncintiswano, bamukelekile ukufika nokomculo kwabo (instruments), okubalekelela lapho becula.

Ngeminye imininingwane abafisa ukungenela bangathinta uNoma Mzimela ku: 031 322 0050, noma i-email ethi: noma.mzimela@durban.gov.za