NGUPITSO Mosimane.

ISITHOMBE NGABE: BACKPAGEPIX

Senzo Sokhela

UYANYANISWA nekilabhu elaxazwe nguRulani Mokwena, uPitso "Jingles" Mosimane ongumqeqeshi waseNingizimu Afrika ohlonishwayo.

UMokwena uthuse abathandi bebhola eshiya umsebenzi wokucija iMC Alger yase-Algeria afike kuyona ekuqaleni kwale sizini.

Ube esethulwa njengomqeqeshi omusha we-Al-Ittihad Tripoli yaseLibya.
Kuthiwa uhehwe ngetshe lemali ukuze ashiye le kilabhu esethubeni lokuthatha isicoco seligi njengoba isesicongweni se-log.

ILANGA Langesonto lithole ukuthi igama likaMosimane lihamba phambili kwabagaqelwe yiMC Alger.

NGURULANI Mokwena obeqeqesha iMC Alger.

ISITHOMBE NGABE: BACKPAGEPIX

UMosimane ugcine ukubonakala kwi-Esteghlal yase-Iran ngesizini edlule abengumqeqeshi wayo. Ushiyile.

Umthombo waleli phephandaba uthe: "UMosimane ungomunye wabaqeqeshi abagaqelwe yile kilabhu yase-Algeria esanda kushiywa nguMokwena.

"Nakuba kungakacaci ukuthi le kilabhu isixhumanile yini noMosimane, kodwa igama lakhe liphezulu kubaqeqeshi abafunwa yiyona.
"Kodwa-ke kuzobonakala ngoba kunemicikilisho ethile esabhekisiswa."

Imizamo yokuthola uMoira Tlhagale weMT Sports Marketing and Management, okuyinkampani ephethe UMosimane - ukuba aphawule ngalolu daba - iphunzile njengoba ucingo lwakhe belungangeni ngesikhathi ezanywa izikhawu ezahlukene.