Amaciko akuleli azoqhudelana nawamazwe omhlaba eMsinga

NGUDKT Sipho Sithole, ongumgqugquzeli weMsinga Folk and Indigenous Music Festival.

Mthobisi Sithole

UZOHLANGANISA amaciko akuleli nawakwamazwe amazwe, umcimbi wokugqugquzela amaciko aseNingizimu Afrika, akhuthalele ukucula bukhoma, edlala izinsimbi.

Lo mcimbi obizwa ngeMsinga Folk and Indigenous Music Festival, uzokwenzelwa ezinkundleni zemidlalo eMzisho, eMsinga, ngoMgqibelo ngomhla ka-21 kwephezulu.

Umgqugquzeli wawo nguDkt Sipho Sithole, owaziwa kakhulu endimeni yezobuciko nomculo. Uthe ngalo mcimbi ufezekisa iphupho lakhe lokuthi amaciko akuleli angabhekani nezinkinga uma sekufanele aye emazweni omhlaba, njengoba kuleli zwe kunganakiwe ukucijwa kwamaciko, ecijelwa ukucula bukhoma (live).

“Selokhu kwaba yisifiso sami esikhulu ukwenza umcimbi endaweni yangakithi eMsinga, futhi kuyangijabulisa ukubambisana noMasipala waseMsinga, nehhovisi likaNgqogqoshe uMntomuhle Khawula, kusukela saqala ukuhlonipha uSolomon Linda, ongumsunguli wesicathamiya.” esho.

Okunye akuchazile uSithole, wukubona ukuwa kwesithunzi somculo kamaskandi, njengoba usaqhakambisa amagidangoma nokuba ngosaziwayo, hhayi umculo.

Uthe kuyihlazo, futhi kuyajabhisa ukubona abaculi abanegalelo elikhulu, kodwa kube yibona ababulala lo mculo.

USithole uthe lo mculo owadlalwa wabuye waqhakanjiswa yizingqalabutho ezifana noMfaz’omnyama, oPhuzushukela, uThwalofu, uBhekumuzi Luthuli, uPhuzekhemisi, iHhashi eLimhlophe, uMfiliseni Magubane, oNgane Ziyamfisa noKhamba Lomvaleliso, nabanye abangasekho, kawusafani njengoba sekuqhudelwana ngabalandeli, nokuthi ngubani othenge imoto kanokusho edlula ekabani, nobucebi.

Esevala, uSithole uthe kunabadlali balo mculo abagcina ukubona imali uma kuqoshwa icwecwe, emuva kwalokho kababe besadlala.  Lokhu uthi sekubangele ubophofu kubadlali bezinsimbi balo mculo, ngenxa yokungaqashwa.

Uthe ngoMgqibelo kuzobe kuboshelwe iNkosi Yamagcokama (esesithombeni esingezansi), uMntuyenziwa, iSoul Brothers, uSimmy, uZakwe, iPomeroy Gordon Stars (cothoza), uLwah Ndlunkulu, uBig Zulu nabanye.

Abasemazweni angaphandle kuzobe kukhona uKommanda Obbs waseLesotho, uBholoja waseSwazini, uPositive Black Soul waseSenegal, nabanye.

Amatikithi atholakala eTicket Pro naseComputicket ngo-R150, kube u-R550 izicukuthwane nango-R850 awe (VVIP).

Ezitolo atholakala ePick n Pay, eShoprite, eJumbo, eSpar, eCheckers, eRhino Cash & Carry, e-USave, ePower Fashion (Tugela Ferry), naseKhonzinkosi Spar (Tugela Ferry).

USithole nomkakhe uNkk Velile Sithole, bake baletha indodana kaBob Marley, uDamian Marley ngo-2017.

Basebenze kakhulu emazweni angaphandle, behambisa abaculi kuma-festival afana noWomad (eNgilandi, eAustralia, eNew Zealand).

Namanye ama-festival afana no-Atlantic Music Expo (Cape Verde), Doa Doa (Uganda), Azgo (Mozambique), Bushfire (Swaziland), Africa Festival (Germany), Edinburgh Festivals (Scotland), Sacred Festival (India), Sakifo Festival (Reunion Island) neSakifo Music Festival (eThekwini).
mthobisis@ilanganews.co.za