Ukhathazwa wukushayeka kwemiqondo yabadlali bePirates

NGUMQEQESHI wePirates, u-Abdeslam Ouaddou.

ISITHOMBE NGABE: BACKAPAGEPIX

Senzo Sokhela

USELWELA ukuthi abadlali bakhe basheshe badlule kokwenzeke emdlalweni wabo omqoka weligi, babhekane nomdlalo ozayo wenkomishi umqeqeshi we-Orlando Pirates, u-Abdeslam Ouaddou.

IBucs iqhathwe neCasric Stars koweLast 16 yeNedbank Cup ngoMgqibelo ngo-18h00 e-Orlando Amstel Arena, eSoweto.

Iya kulo mdlalo nje, iqhuzuke okokuqala emuva kwesikhathi eside ihlulwa yiMamelodi Sundowns ngo-2-1 koweBetway Premiership ngoLwesithathu ebusuku eFNB Stadium, eSoweto.

NGABADLALI bePirates; uMasindi Nemtajela, uNkosinathi Sibisi noDeon Hotto behlanganyela uKhulumane Ndamane weDowns.

ISITHOMBE NGABE: BACKAPAGEPIX

Amagoli eDowns ashaywe nguBrayan Leon, kwathi eleBucs laqotshelwa nguPatrick Maswanganyi.

U-Ouaddou uthi kuzofanele bakhohlwe ngokwenzekile, babhekise imiqondo yabo kulo mdlalo weCasric.

"Yebo besifuna ukunqoba ukuze sivule igebe esicongweni se-log, kodwa kwangenzeka. Ngikholwa wukuthi isiwombe sokuqala kube ngesabo, esesibili kwaba ngesethu, kodwa sahluleka wukuthola igoli lokulinganisa.

"Siwatholile amathuba kodwa njengenjwayelo, sehluleka wukuwavalela enethini.
"Abadlali bami ngisazokhuluma nabo, kakufanele babhekise amakhanda phansi.

"Iseminingi imidlalo ezayo. Imiqondo yethu manje kufanele siyibhekise kulo mdlalo wenkomishi, sikhohlwe ngokwenzekile ngoba ngeke sisakuguqula.

"Okumqoka manje wukuya kulo mdlalo wenkomishi siwunqobe ukuze sibuyise ukuzethemba kwethu," esho.

Isiyonke imidlalo yeNedbank Cup Last 16 iqhathwe kanje:-
NGOLWESIHLANU
EMhlathuze Sports Complex: Richards Bay FC vs AmaZulu 19h00.
NGOMGQIBELO
ESolomon Mahlangu Stadium: TS Galaxy vs Mamelodi Sundowns 15h00.
EMxolisi Dicky Jacobs Stadium: Upington City vs Durban City 15h00.
EKing Zwelithini Stadium: Golden Arrows vs Stellenbosch 18h00.
E-Orlando Amstel Arena: Orlando Pirates vs Casric Stars 18h00.
NGESONTO
EMxolisi Dicky Jacobs Stadium: Jacksa Spears vs Vasco da Gama 15h00.
EMhlathuze Sports Complex: Milford vs Mkhambathi 15h00.
ETuks Stadium: University of Pretoria vs Sekhukhune United 15h00.