IWanderers ivuma eyokuthuka isisinga kwiMFC

NGUSDUDUZO Dlamini ongumdlali weWanderers. 

ISITHOMBE NGABE: BACKPAGEPIX

Mfanafuthi Ndlovu

IPHEZU kwemizamo yokulungisa isiqalo esibi iMidlands Wanderers ezokwamukela iHighbury FC koweMotsepe Foundation Championship (MFC) ngoMgqibelo ngo-15h00 eHarry Gwala Stadium, eMgungundlovu.

IWanderers iyiqale kabi le sizini okwenza ibalwe namakilabhu asezansi kwi-log yalesi sigaba, engomakoti kusona.

UThulisani "Gattuso" Latha oyiphini lomqeqeshi kwiMidlands, utshele ILANGA Lempelasonto ukuthi okubashayayo wukuthi baqale lesi sigaba ngabadlali abasathuka isisinga kusona.

"Siqale kabi siyavuma, kepha sizozama ukuguqula izinto. Sesiwabonile amaphutha. Okwamanje sisalwa nokuqinisa ukhakhayi lwabadlali bethu, bakwazi ukumelana nezinselelo zalesi sigaba ngoba sifuna basiqonde ngokushesha.

"Okunye okusasishaya, wukuhamba amabanga amade ukuya emidlalweni, okuyinto esiyiqabukayo kulesi sigaba," esho.

NGUKAGISO noSenzo bakwaNdlovu beHighbury FC, okulindeleke ukuba bathwalise kanzima iWanderers. 

Nokho uthi iHighbury izozifica zigawulwe zabekwa izinduku zokubhekana nayo.

USduduzo Dlamini olihlikihla esiswini kwiWanderers, utshele leli phephandaba ukuthi bazimisele ngokubuya namaphuzu agcwele kulo mdlalo ukungaphoxi abalandeli, okubhekwe ukuba baphume ngobuningi ukuyofaka abadlali ugqozi.

* Kuzo ezeMFC, umdlalo weBlack Leopards neLerumo Lions ngeke ugijinywe njengoba isahlehlisiwe imidlalo (yeLeopards) ebhekene ngeziqu zamehlo neFifa.

Isiyonke imidlalo yeMFC engempelasonto imi kanje:-
NGOMGQIBELO
EHarry Gwala: Midlands Wanderers vs Highbury 15h00.
EMxolisi Dicky: Upington City vs Gomora United 15h00.
E-Absa Tuks: University of Pretoria vs Hungry Lions 15h00.
NGESONTO
ESolomon Mahlangu: The Bees vs Milford FC 15h00.
ENorth West University (NWU): Leicesterford City vs Venda FC 15h00.
EGlobal Village: Baroka FC vs Casric Stars 15h00.
E-Athlone Stadium: Cape Town City vs Kruger United 15h00.