UNdlunkulu weSilo uZwelithini wethweswe iziqu zobudokotela

ISILO uMisuzulu kaZwelithini, sihalalisela unina uNdlunkulu uThandekile, ebesimphelezele eyokwethweswa iziqu zobudokotela e-UKZN.
ISITHOMBE: SITHUNYELWE

Mthobisi Sithole

WETHWESWE iziqu zobudokotela e-University of KwaZulu-Natal (UKZN), eWestville, eThekwini, ngoLwesine undlunkulu wesine weSilo uZwelithini, uMdlokombane.

UNdlunkulu uThandekile, uMaNdlovu (75), wethweswe iziqu zobudokotela emkhakheni 
 weBusiness Administration (DBA).

 Ngokocwaningo - olumenze wazuza lezi ziqu - ubebheka ukusebenza, nokuthengiswa kwe-stevia (ebambele ushukela wemvelo) eKenya, ukuthi ingatshalwa yini eNingizimu Afrika, ngenhloso yokuthengiswa. 

Lesi sihlahla kuthiwa sikhiqiza ushukela wemvelo.

UNDLUNKULU weSilo uZwelithini,  uThandekile, ubethweswa iziqu zobudokotela e-UKZN.
ISITHOMBE: SITHUNYELWE

Ngokwesitatimende esikhishwe yi-UKZN, uNdlunkulu uMaNdlovu wenze lolu cwaningo ngenxa yokubona abantu abaningi behlaselwe yisifo sikashukela, ngisho  nasemndenini wakhe imbala.

"Kunabantu abaningi abadlule emhlabeni behlushwa yisifo sikashukela, ungalawuleki. Ngokuhamba kwesikhathi, ngifunde komunye osebenza emkhandlwini, owenza ucwaningo nge-stevia, okuyisitshalo esilawula ushukela nezinye izimo zempilo," kusho uNdlunkulu uMaNdlovu.

YISONA isihlahla se-stevia lesi, uNdlunkulu uMaNdlovu abecwaninga ngaso.

Uveze ukuthi emuva kokufunda kabanzi nge-stevia, ube esephenya ukuthi ingasetshenziselwa yini ukusiza kuleli, ngenhloso yokwenza inzuzo, nokuthuthukiswa komnotho.

Uthe ucwaningo lwakhe kaluvumelananga nalokho.

"Singasetshenziswa lesi sitshalo ukuthuthukisa abalimi," esho.
Uthe eKenya i-stevia le, izuzisa kakhulu umphakathi, abanye baziphilisa ngokuhweba ngayo.

Ulwazi olunzulu ngalolu cwaningo, uluqoqe kubalimi baseKenya ngokwenza inhlolovo, ngenhloso yokwazi kabanzi ngokwenza inzuzo ngalesi sitshalo.

UNdlunkulu uveze ukuthi lolu cwaningo lungathela izithelo ezinhle uma lungasetshenziswa kuleli.

LAPHA sikhonjiswa sesigayiwe.

Ngokusho kwe-UKZN, uMaNdlovu unothando lwezempilo njengoba engumsunguli wesikhwama esigxile kakhulu kwezempilo, nesiko, okuyiQueen Foundation Trust.

I-deputy vice-chancellor yenyuvesi, uSolwazi Ernest Khalema, ibongele uNdlunkulu uMaNdlovu, yathi lokhu akwenzile kuzokhuthaza nabanye besifazane asebekhulile, ukuba bazithuthukise emfundweni.
mthobisis@ilanganews.co.za