Igcagcele esokeni ngokumiswa kukaNabi kwiChiefs

Senzo Sokhela

UBONA liphume nobovu ngokumiswa kukaNasreddine Nabi ekuqeqesheni iKaizer Chiefs uFani "Didiza" Madida ozakhele igama egijima kule kilabhu yasePhefeni.

IChiefs izodlala neKabuscorp yase-Angola emlenzeni wokuqala wokuhlunga weCaf Confederation Cup ngoMgqibelo ngo-17h00 kulo leliya lizwe.

Kuvela ukuthi izoya kulo mdlalo ngaphandle kukaNabi, okuthiwa umisiwe ukuzihlanganisa nayo.

Kuthiwa umiselwe ukungabi nawo amaphepha amgunyaza ukuhlala ebhentshini emidlalweni yeCaf.

IChiefs kuthiwa ithi wephule isivumelwano senkontileka njengoba kuthiwa akazange akuveze lokho ngesikhathi eyisayina.

UKUJABHA bekubhalwe ebusweni kubalandeli beziMpofana emuva kokuba iSekhukhune United ithole igoli lesibili koweligi ngoLwesibili. Umdlalo ugcine uphele ngo-3-1, kudliwa iChiefs.

ISITHOMBE NGABE: BACKPAGEPIX

UMadida - obengumgadli weChiefs ongalibheki ipali ngeminyaka yama-1990's - uthi igcagcele esokeni ngokumiswa kukaNabi.

"IChiefs izodlala kahle kabi ngaphandle kukaNabi. Lokho kangikususeli ekhanda, kubonakele ngesikhathi engekho kuqala isizini, iChiefs ibidlala kangcono kabi, uvele wabuya yaba ngenye into.

"Bengikhona emdlalweni weSekhukhune United ehlulwe kuwona ngo-3-1 eFNB Stadium, iChiefs ibinhlakanhlaka, bekufanele ishaywe.

"Uma ubuka amagoli kaBradley Grobler, uyabona nje ukuthi ibingahlelekile kahle emuva.

"Njengoba iya kulo mdlalo weCaf, uma izovuleka njengoba beyenza emdlalweni weSekhukhune, izoba nenkinga.
"Kuzofanele yenze isiqiniseko sokuthi iyavala emuva ngoba kwiCaf kakucucuzwa.

"Kodwa-ke njengoba uNabi ezobe engekho, nginethemba ngoba ufike wayibuyisela emuva ikilabhu ekubeni bese yenza kahle engekho," kusho uMadida.

Kakuyena uMadida kuphela ozizwa ngalolu hlobo njengoba abalandeli abaningi beChiefs bekholwa wukuthi kayenzi kahle uma lo mqeqeshi esebhentshini, kodwa izinto ziyashintsha uma amasekela ezibambele wodwa.

Lokhu bakuzwakalisa ezinkundleni zokuxhumana ezahlukene.