Inkantolo igunyaze ukumbiwa kwesidumbu sikaNkonyane

Ngobengumengameli wamaZayoni, uThamsanqa Nkonyane, waseNyonini Mission oSizweni, eNewcastle.

Mthobisi Sithole
noJohn Hlongwa

INKANTOLO eNkulu yaseMgungundlovu igunyaze ukuthi kuyombiwa isidumbu sobengumengameli wamaZayoni, uThamsanqa Nkonyane, waseNyonini Mission, oSizweni, eNewcastle.
Isinqumo sikhishwe izolo ngoLwesine.

Lolu daba beluphethwe abameli bakwaNW Mkhabela Attorneys, uNtokozo Mkhabela esebenzisana no-Advocate Kwazi Mshengu owayengungqongqoshe wezeMfundo KwaZulu-Natal.

Inkantolo inikeze inkosikazi endala uNkk Dolly (uMaNgcobo) ilungelo lokungcwaba obengumengameli webandla uNkonyane, okusolwa ukuthi wangcatshwa 'yisincanakazane' isinyenyelela, nohlangothi oluthile lwebandla ungazisiwe umndeni wakwaNkonyane.

Isincanakazana sobengumengameli waseNyonini uNkz Sizeni Khuzwayo-Mazibuko, kuyalelwe abameli baso ukuthi kuzomele sikhokhe izindleko zecala, sikhombe ukuthi isidumbu sikaNkonyane sangcatshelwa kuphi.

Ijaji lithe lolu daba luzosingathwa ngamaphoyisa uma sekuqalwa uhlelo lokumbiwa kwesidumbu.

Enkantolo abuvelanga ubufakazi bokuthi isincanakazana besishadile noNkonyane,  kanti inkosikazi endala uNkk Dolly Nkonyane, ishadile. UNkz Khuzwayo-Mazibuko ubethumele abameli bakhe enkantolo, abangawafakanga amaphepha okuphikisa isicelo ebesifakwe wuhlangothi lwenkosikazi endala.

Abazalwane nabafundisi bebandla bebekhona enkantolo.

Inkampani yabangcwabi iCebolethu lethu okuyiyona eyayisingethe ukugcinwa kwesidumbu, kayithintekanga kulolu daba enkantolo ngenxa yokuthi kayikho incwadi yesivimbelo senkantolo eyanikezwa abeCebolethu ngesikhathi singakakhishwa isidumbu emakhazeni.

Udaba luNkonyane lubesematheni ngesikhathi engcwatshwa kugasela amaphoyisa enkonzweni yomngcwabo nencwadi yasenkatolo, yokumisa umngcwabo ukuba ungaqhubeki.

Isicelo enkantolo sasifakwe yinkosikazi endala uNkk Dolly, uMaNgcobo. Ngesikhathi sekuthathwa ibhokisi, emngcwabeni, kube sekutholakala ukuthi kasikho isidumbu phakathi ebhokisini kufakwe amatshe.

Kusolwa ukuthi isidumbu sangcatshwa ebusuku isinyenyela ngosuku olwandulela inkonzo yomngcwabo.
mthobisis@ilanganews.co.za