Kuqokwe ibhodi elisha le-1KZNTV

Lucky Cain

INHLANGANO eyengamele omabonakude bomphakathi, i-Association of Community Television of South Africa (ACT-SA), income i-1KZN ngokungaba-khohlwa ababukeli bayo kule minyaka ewu-17 isemoyeni.

UNkk Elize Viljoen wale nhlangano, ubalwa nabanye abahalalisele lesi siteshi sikamabonakude somphakathi esizinze KwaZulu-Natal, ngesikhathi sibambe umhlangano waso wonyaka (AGM), obuhambisana nokuqoka amalungu amasha ebhodi.

UNkk Viljoen uthe lesi siteshi kule minyaka sikhona emoyeni, besilokhu siqhubekile nokubeka ababukeli baso phambili, ikakhulukazi labo abazifela ngamasiko aKwaZulu, abaholi nabelaphi bendabuko, abefundisi nabantu abasha.

Isiteshi i-1KZN sibalwa nezinye ezikhona eNingizimu Afrika njengoba kuyisona sodwa esizinze kulesi sifundazwe. Kulo mhlangano obuwenganyelwe nguMnu Jacob Ntshangase weSizwe Media, obenguSihlalo weBhodi uMnu Chris Mkhize, wamukele izicukuthwane, waphinde wethula nombiko wehlandla lakhe lokuba ngusihlalo webhodi lalesi siteshi.

Ngaphansi kobuholi bukaMkhize, lesi siteshi sikwazile ukunqoba nokudlula ezingqinambeni zobhubhane lweCovid-19, saphinde sakwazi nokukhula nangababukeli, njengoba sebefinyelele ku-5 million ngokusho kwakhe.

UMnu Edwin Mncwango ongumphathi walesi siteshi, wethule umbiko ngokusebenza kwaso, waphinde wacacisa nangombono waso kule minyaka ezayo.

Enkulumweni yakhe uMncwango, ubeke ulwimi lwesiZulu eqhulwini, nokuqhambisa amasiko esizwe.

Ubonge ithimba asebenzisana nalo ukuqinisekisa ukukhula kwaso, waphinde wazigqaja ngokuthi bakwazile ukuvula amagatsha namahhovisi ezindaweni ezahlukene, kusukela lesi siteshi sasungulwa.

Ubale izindawo ezifana noMgungundlovu, iPort Shepstone, iNewcastle naseThekwini lapho asebenamahhovisi khona.

I-1KZNTV ike yanombango wasenkantolo

Lesi siteshi sike saba sematheni ngesikhathi kunombango wasenkantolo phakathi kwaso nobenguSihlalo waso, uMnu Themba Fakazi, okuqubuke izinsolo ezinqala ezithinta ukusetshenziswa budlabha kwemali yaso.

Kulo mhlangano obuhanjelwe ngosopolitiki, osomabhizinisi, izikhulu zikamasipala neminyango kahulumeni, kugcine kuqokwa uNkz Nokwazi Miya njengoSihlalo webhodi, uDkt Michael Mchunu njengePhini, uMnu Mandla Msomi kwesikaNobhala, kwathi uNkk Gugulethu Mhlongo waqokwa njengePhini, uMnu Siphiwe Mabaso yena uqokelwe kwesikaMgcinimafa.

Esitatimendeni esikhishwe yilesi siteshi, siveze ukuthi siyawemukela amalungu ebhodi, sawa-fisela okuhle kwihlandla lawo.