Siyazishwashwatha

NGUYANGA Madiba (okwesokudla) enozakwabo kwiBucs, uKarim Kimvuidi.

ISITHOMBE NGABE: BACKPAGEPIX

I-ORLANDO Pirates iyaqhubeka nokwelekelela i-Orbit College engomakoti beBetway Premiership ngokuyeboleka abadlali, njengoba seyiphinde yayinika uYanga Madiba oyisitobha, noThuso Moleleki odlala esiswini.

Laba badlali bazojoyina uMonnapule Saleng osanda kujoyina le kilabhu emkhulisile, emuva kokuba nezinkinga eziholele ekutheni agcine engasadlaliswa kwiBucs ngesizini edlule, ayiqede esehlala nezihlwele.

NGU-JASPER Wiese enozakwabo kumaBhokobhoko, u-Ox Nche.

ISITHOMBE NGABE: BACKPAGEPIX

UGCULISEKILE ngesigwebo esinikwe umdlali wakhe uRassie Erasmus ongumqeqeshi wamaBhokobhoko azogadulisana neGeorgia kowokugcina weCastle Lager Incoming Tour ngoMgqibelo ngo-17h00 eMbombela Stadium, eMpumalanga.

Lo mqeqeshi ukhuluma ngomdlali wakhe uJasper Wiese omiswe imidlalo emine emuva kokushaya ngekhanda uDanilo Fischetti ongumdlali we-Italy, okwenze unompempe, u-Andrew Brace wamkhipha ngekhadi elibomvu.

"Ngicabanga ukuthi isigwebo semidlalo emine siyisinqumo esikahle. Konke kuhambe kahle, nginesiqiniseko sokuthi nomdlali wenelisekile," esho.

UWiese uzophuthelwa wumdlalo weGeorgia, emibili ye-Australia nowodwa we-All Blacks yaseNew Zealand.
Nakuba engeke ayidlale le midlalo, kodwa uzothola ithuba lokudlala emithathu yeChampionship. AmaBhokobhoko yiwona avikela le ndebe.

NGU-LAMINE Yamal oyisilomo seFC Barcelona.

ISITHOMBE NGABE: BACKPAGEPIX

UZIZWA ethobekile ngokunikwa unombolo 10 uLamine Yamal ongumdlali weBarcelona yaseSpain, olokhu eqhubeka njalo nokuzifaka ezinhliziyweni zabathandi bakanobhutshuzwayo ngenxa yengcwenga ayidlalayo.

UYamal ungomunye wabadlali okubhekeke ukuba bakhale bemuke nomklomelo womdlali ovelele kule sizini ezokwethwasa uma ezoqhubeka nokukhuphula izinga lomdlalo wakhe. 

Unombolo 10 kwiBarcelona uhlonishwa kakhulu kwazise ufakwa ngabadlali abahlonishwayo kuphela okubalwa kubona uRivaldo noRonaldinho baseBrazil, kanti leli jezi ligcine ligqokwa nguLionel Messi wase-Argentina.

 IBarcelona kubhekeke ukuba ivuke izithathe kule sizini njengoba ibhekene nomqansa wokuvikela iligi neSpanish Cup.