NGABALINGISI bomdlalo Isibaya obalwa nehamba phambili kwekhonjiswe yiMzansi Magic. 

Lucky Cain

SIGUBHA iminyaka ewu-15 saqala ukusakaza izinhlelo, isiteshi sikamabonakude esingaphansi kweMultiChoice, uMzansi Magic, esesikhiqize inqwaba yemidlalo enedumela eNingizimu Afrika.

Lesi siteshi esigabe ngemidlalo nezinhlelo ezikhiqizwe kuleli, sizogubha le minyaka ngokuba nesiteshi esiyisipesheli esiqale ukubonakala ngoMgqibelo odlule kumabonakude, esizotholakala kuDSTV Channel 196.

Ngokusho kwabakwaMultichoice, lesi siteshi esiyisipesheli sizokhumbuza ababukeli ngezinhlelo ezibe nedumela kuMzansi Magic, kusukela lesi siteshi saqala ukusakaza izinhlelo.

NGABALINGISI be-Inkaba, eyaba ngomunye wemidlalo yokuqala ukunyakazisa ababukeli kulesi siteshi. 

Phakathi kwemidlalo nezinhlelo ezizobonakala kulesi siteshi esiyisipesheli, kubalwa Inkaba - okuwumdlalo wokuqala owabonakala kulesi siteshi okhiqizwe kuleli - kube Isibaya esaba wumdlalo wokuqala owuchungechunge ukukhonjiswa kusona; bese kuba nezinye okubalwa kuzo iRockville, iDate My Family, neLockdown.

Isikhulu esiphezulu seziteshi zakuleli kwaMultichoice, uShirley Adonisi, sithe uMzansi Magic yisiteshi esiqhakambisa kakhulu imidlalo nezinhlelo ezivutshelwe kuleli, futhi bayazigqaja ngalokho.

"Lesi siteshi esiyisipesheli siyindlela yokuthi siyabonga Mzansi ngale minyaka ewu-15 sikhona emoyeni. Kube ngabantu baseMzansi abasemukelile lesi siteshi, basenza esabo, yingakho sibonga bona ngokukhula kwaso, ngokuzibophezela nokusithanda kwabo," kusho uShirley.

"Sifuna ukubakhumbuza ukuthi basukaphi nalesi siteshi ngezinhlelo zabo abazithandile kule minyaka eyedlule," kusho yena - kwazise eminye yayo iphele emoyeni, abantu besayithakasela.

Uqhube ngokuthi ngaphandle kokukhumbuza ababukeli ngemidlalo nangezinhlelo, bazobungaza nabalingisi abazalwe yilesi siteshi, babonakala bekhula besabalalisa izimpiko zabo kulo mkhakha.

Lesi siteshi esiyisipesheli sizobonakala izinyanga ezintathu njengoba sizoze sivalwe ngoSeptember nonyaka, kanti sizobe sivulelekile kulabo abakwaziyo ukuthola uMzansi Magic kuma-package abo eDStv.