Mzwamandla Zondi

KUBHEKWE abasubathi baseNingizimu Afrika ukuqhubeka nokuphakamisa ifulegi lakuleli kwiDiamond League ezokuba ngoMgqibelo eLondon, e-England.

IDiamond League idlalelwa emadolobheni amakhulu awu-15 emhlabeni, kanti omunye wemilenze uba seMorocco, e-Afrika.

Ngempelasonto zizokube zigadulisana emlenzeni ka-11 oseLondon. Phakathi kwabasubathi okubhekwe ukuba baphakamise ifulegi lezwe kulo mqhudelwano, kukhona noZakithi Nene waseMnambithi, osefomini enhle nonyaka.

UZakithi - oqeqeshwa nguVictor Vaz - uzokube ebagadulisa kwi-400m kanti wenze kahle nonyaka eba yingqwele yakuleli ye-400m kwiSouth Africa National Championships, ngasekuqaleni konyaka eNorth-West.

 Ngemuva kwalokho, usize iqembu lakuleli le-4x400m lenza isikhathi sokubamba iqhaza kwiWorld Athletics Championships ezokuba ngoSeptember eJapan.

NGU-AKANI Simbine (ophakathi) eshikilisa izethenjwa zaseJamaica u-Oblique Seville noKishane Thompson.

ISITHOMBE NGABE: BACKPAGEPIX

Usanda kuqopha isikhathi esisheshayo kwi-400m, okuwu-44:22. Ngendlela enza ngayo nonyaka, ubonakala esondela kancane kwirekhodi lomhlaba le-400m eliphethwe nguWayde van Niekerk, eliwu-43:03.

Kungena elikaWayde nje, kubukeka izinto zingamhambeli kahle selokhu walimala edlala umbhoxo.

Abaphathi bakaNene bakuqinisekisile ukuthi uzokube eyingxenye yemilenze elandelayo yeDiamond League ezokuba seBrussels, eBelgium, naseZurich eSwitzerland ngokwehlukana.

Omunye umsubathi wakuleli ozokube eyingxenye yalo mqhudelwano waseLondon, ngu-Akani Simbine owenza i-100m.

USimbine uzokube ebhekene noTebogo Letsile waseBotswana, uLyles Noah wase-United States of America (USA), uHughes Zharnel waseGreat Britain, ukubala nje abambalwa kwi-100m.