Ezemidlalo | 17
Friday, 18 April 2025
Ubomvu yimali umgijimi ophule irekhodi
Uthole u-R200 000 onqobe i-Absa Run Your City Gqeberha 10k
NGU-ADRIAAN Wildschutt ogoduke no-R200 000 emuva kokuphula irekhodi kwi-Absa Run Your City 10k.
ISITHOMBE NGU: ANTHONY GROTE
Mzwamandla Zondi
WENZE imali elinganiselwa ku-R200 000 u-Adriaan Wildschutt ngokwephula irekhodi laseNingizimu Afrika le-10km kwi-Absa Run Your City Gqeberha 10k ngeSonto.
Lo msubathi unqobe lo mjaho ngo-27:28, ephula irekhodi lakuleli eliwu-27:35 ebeliphethwe nguPrecious Mashele alenza ngo-2023 kuwona lo mjaho.
Ngokunqoba kukaWildschutt, uhlomule ngo-R30 000, kwaba wu-R120 000 ngokwenza isikhathi esingaphansi kuka-27:30 no-R50 000 ngokwephula irekhodi - okuhlanganisa u-R200 000.
Omunye umsubathi ohlomule ngemali enhle kulo mjaho, nguKabelo Mulaudzi ongene endaweni yesithathu ngo-27:57, okwenze waklonyeliswa ngo-R60 000, okuwu-R20 000 ngokungena isithathu no-R40 000 ngokwenza isikhathi esingaphansi kuka-28:00 - ohlelweni lwalo mjaho olubizwa nge-Absa Run Your City Series South Africa Incentive Programme.
KWESOBUNXELE: nguGlenrose Xaba ohlomule ngokulala isithathu kwabesifazane.
ISITHOMBE NGU: ANTHONY GROTE
Kwabesifazane, uGlenrose Xaba ongene endaweni yesithathu, naye uhlomule ngo-R60 000 - okuwu-R20 000 ngokulala isithathu no-R40 000 ngokwenza isikhathi esiwu-32:08.
Lo mjaho uwumlenze wokuqala kwewu-5 ehlelwe ngabakwa-Absa bebambisene nabakwaStillwatersports.
Owesibili uzokuba seCape Town ngenyanga ezayo, kulandele owaseThekwini ngoJuly, kube owaseTshwane nowaseGoli ngokwehlukana.
Abakwa-Absa bakhiphe u-R1.6 million kule mijaho engenhla kanti umjaho ngamunye unesamba sika-R322 000.
UWildschutt uthe ujabule ngokuhlomula ngemali enkulu ngalolu hlobo. Uthe le mali ifike kahle kwazise uzokwazi ukujabulisa umndeni wakhe ehleli nawo njengoba isikhathi esiningi esichitha phesheya kwezilwandle, lapho azinze khona.