Seyikuvuthondaba eyomqhudelwano wamakilabhu aKwaZulu-Natal

Mfanafuthi Ndlovu

ISIKUVUTHONDABA imidlalo yeMathemba Super Cup egijinywa ngamakilabhu adlala kwiSafa KwaZulu Natal (KZN) ABC Motsepe League, ezoqhubeka ngoMgqibelo ezinkundleni ezahlukene zakulesi sifundazwe.

Izingqwele zalo mqhudelwano zizohlomula ngo-R100 000, besekuthi abalale isibili bagoduke no-R50 000.

Kugijinywa lo mqhudelwano nje, kwiligi yalesi sigaba - kulesi sifundazwe - sekusele imidlalo emibili ukuba kusongwe isizini ka-2025/26.

Emakilabhini asembangweni ukumela iKwaZulu-Natal kweyama-play-off, wuMsinga United obanga noMkhambathi FC ku-stream A, kanti ku-stream B kubanga uMvoti FC neNjampela.

UKwenzakwakhe Ngwenya (osesithombeni), omele iSafa KwaZulu-Natal, utshele ILANGA Lempelasonto ukuthi konke kusahamba kahle kwiMathemba Super Cup nakwi-ABC Motsepe League.

* Isiyonke imidlalo yeMathemba Super Cup Elimination Round engempelasonto iqhathwe kanje:-
NGOMGQIBELO
KwaNcedomhlophe: Tornado FC vs Summerfield Dynamos 10h00; UMvoti FC vs UMlazi Young Lions 12h00. Abazonqoba kule midlalo bazobhekana kowamanqamu ngo-15h30.
EMzisho Stadium: UMsinga United vs Chess FC 10h00; UMgungundlovu FC vs KwaMashu Durban Knights 12h00. Abazonqoba kule midlalo bazodlala owamanqamu ngo-15h30.