KUSUKA kwesokudla; nguHenry Basie ololonga iHungry Lions, uSiphosethu Ndlabi ongumgadli weMilford FC, nguLorenzo Gordinho noSthembiso Ngcobo abayizitobha zeCape Town City noTshigwana Mthombeni ongunozinti weCasric Stars.

IZITHOMBE NGABE: BACKPAGEPIX

Mfanafuthi Ndlovu

YIMIZUZU ewu-90 eyehlukanise amakilabhu amane agijima kwiMotsepe Foundation Championship (MFC) nokufezeka kwephupho lamabili, lokudlulela emidlalweni yePSL Promotional Play-Offs, eyisango lokungena kwiBetway Premiership.

Amakilabhu akulo mbango yiMilford FC, iCape Town City, iHungry Lions neCasric Stars. IMilford izodlala neLions, kanti ozonqoba kulo mdlalo, nakanjani uzongena kuma-play-off.

Lo mdlalo ungeSonto ngo-15h00 eMxolisi Dicky Stadium, eNorthern Cape.

ICape Town City izolwela ukuwaqoqa wonke amaphuzu uma seyibhekene neLeicesterford City ngeSonto eDobsonville Stadium ukudlulela kuma-play off, kanti iCasric idinga ukunqoba besithandazela ukuthi kudliwe iCape Town City neHungry Lions ukuze idlulele phambili.

IMilford idinga iphuzu ukudlulela phambili.
ICasric izoshukana neGomora United eSolomon Mahlangu Stadium.
Yonke le midlalo ingeSonto ngo-15h00.

NGU-HENRY Basie.

UHenry Basie ocija iHungry Lions, utshele ILANGA Lempelasonto ukuthi konke usekubeke kuNkulunkulu ngekusasa labo.

Uthe akuqaphelile kule sizini wukuthi ubenabadlali abafuna impumelelo, kungefani nakulawa adlule.

Uthe namanje akakholwa ukuthi iqembu lakhe libalwa namakilabhu asasele embangweni wokulwela ukungena kwiBetway Premiership ngesizini ezayo.

"Umdlalo owasimosha kule sizini, yilapho esavumela khona ukudliwa yiGomora United, ngaphandle kwawo, sikwazile ukunqoba imidlalo ewu-10 ilandelana.

"Abadlali bami bakwenze konke enkundleni, ngiyaziqhenya ngabo. Sizobhekana nekilabhu engiyihloniphayo ngenxa yebhola elihle eligijimayo, iMilford. Sengibeke wonke amathemba ami kuMdali," esho.

Isiyonke imidlalo yeMFC yokuvala isizini imi kanje:-
NGESONTO
ESolomon Mahlangu Stadium: Casric Stars vs Gomora United 15h00.
KaNyamazane Stadium: Kruger United vs The Bees 15h00.
EDobsonville Stadium: Leicesterford FC vs Cape Town City 15h00.
EMxolisi Dicky Stadium: Hungry Lions vs Milford FC 15h00.
EThohoyandou Stadium: Venda FC vs Highbury FC 15h00.
ENorth West University Stadium: Lerumo Lions vs Black Leopards 15h00.
ETuks Stadium: Pretoria University vs Midlands Wanderers 15h00.
EGlobal Village: Baroka FC vs Upington City 15h00.