NGABADLALI bePirates bejabulela elinye lamagoli awu-3, abalishaye bedla iMagesi FC emdlalweni odlule. 

ISITHOMBE NGABE: BACKPAGEPIX

Zakhele Mchunu

YETHULELWE isigqoko i-Orlando Pirates ngengcwenga yebhola eyidlala uma ise-Orlando Amstel Arena, eSoweto, lapho izoshukana khona neDurban City koweBetway Premiership ngoMgqibelo ngo-15h00.

Uma inqoba lo mdlalo iPirates, izoqeda ukuchanasa kweminyaka ewu-8 kweMamelodi Sundowns ebeyilokhu izenzela umathanda ekuqukuleni isicoco seligi, ibuye ingene emlandweni wokuba yikilabhu yokuqala ukunqoba i-treble kathathu selokhu kwasungulwa iPremier Soccer League (PSL) ngo-1996/97.

Yaqukula i-treble yokuqala ngesizini ka-2010/11 nengeka-2011/12, njengoba seyisemgqeni wokwenza okufanayo nakulena ka-2025/26.

Kule sizini iphethe iMTN8, iCarling Knockout -  ehambisana neCarling Cup (edlalwa nesikwati esiqokwa ngabalandeli) - njengoba isisemgqeni weligi.

NGU-ARTHUR Zwane ongumqeqeshi wamaZulu FC exhawulana nomqeqeshi wePirates, u-Abdeslam Ouaddou, kanti kwesinye unoMandla Ncikazi, oyisekela lomqeqeshi weBucs.

ISITHOMBE NGABE: BACKPAGEPIX

U-Arthur " 10111" Zwane ocija AmaZulu FC, uthi ngokwakhe kakusekho okuzovimba iBucs ekudleni ubhedu lweligi.

Uthi ubezitshela ukuthi iSundowns izokulwa kuze kube sekugcineni, kanti izovele isidedele isicoco yehlulwa yiTS Galaxy ngo-3-2 ngoLwesibili eMbombela Stadium, eMpumalanga.

Uthi iPirates kayibhenywa uma ise-Arena njengoba inika izitha zayo imbudlu yamagoli - okuwu-5-0 eyawugaxa iLamontville Golden Arrows no-3-0 owatholwa ngamaZulu FC - ekubeni yabhudluza iTS Galaxy ngo-6-0 eMbombela endleleni yayo yokuvula igebe lamagoli ecindezele ngawo amaSandawana.

"IPirates beyilokhu idlala kahle kula masizini adlule njengoba ibiyibambile indawo yesibili (kwi-log), kodwa kule sizini ilenyuse kakhulu izinga, kayibhenywa, ikakhulukazi uma ise-Arena. Kufanele siyincome ngalokho," esho.

Uthi uyibona izoyiqukula le ndebe kule mpelasonto.

UZwane ubekhuluma esigcawini sabezindaba njengoba uSuthu luzodlala neKaizer Chiefs ngoMgqibelo ngo-15h00 eMoses Mabhida Stadium, eThekwini.

Uthi bahlose ukuyiqumba phansi iChiefs, ukuvala isizini ngenothi elihle ekhaya.