NGUTHABANG Matuludi (okwesokudla) enozakwabo kwiBafana Bafana, ayegijima naye kwiPolokwane City, u-Oswin Appollis.

ISITHOMBE NGABE: BACKPAGEPIX

Senzo Sokhela

I-ORLANDO Pirates icathamela esinye  isibabuli sePolokwane City neqembu lesizwe laseNingizimu Afrika, iBafana Bafana.

IBucs izobhekana neDurban City koweBetway Premiership ngoMgqibelo ngo-15h00 e-Orlando Amstel Arena, eSoweto.

Iya kulo mdlalo nje, isidinga iwini ukuze ibe yizingqwele zeBetway Premiership.

Leli phephandaba lihoshe ngemithombo yalo ukuthi iBucs ifuna uthuli uThabang Matuludi (27),  odlala emuva kwiPolokwane City nakwiBafana Bafana.

Kuvela ukuthi izingxoxo seziqalile phakathi kwala makilabhu.

NGU-IRVIN Khoza ongusihlalo wePirates.

Umthombo weLANGA Lempelasonto, uthe: "IPirates inobudlelwano obuhle nePolokwane City, yingakho nje no-Oswin Appollis egcine eya kuyona ekubeni neChiefs beyimfuna.

"Izingxoxo ziphakathi manje, sekubambe izinto ezincane bese uMatuludi eba ngumdlali wePirates."

Imizamo yokuthola uSihlalo weBucs, u-Irvin Khoza, okunguyena okuthiwa usingethe lolu daba ukuba aphawule ngalo, iphunzile njengoba ucingo lwakhe belukhala kodwa lungabanjwa.

Isiyonke imidlalo yeBetway Premiership engoMgqibelo imi kanje:
EMoses Mabhida Stadium: AmaZulu vs Kaizer Chiefs 15h00.
ENelson Mandela Bay Stadium: Chippa United vs Golden Arrows 15h00.
E-Orlando Amstel Arena: Orlando Pirates vs Durban City 15h00.
E-Old Peter Mokaba Stadium: Polokwane City vs Marumo Gallants 15h00.
EMhlathuze Sports Complex: Richards Bay vs Sekhukhune United 15h00.
EDr Petrus Molemela Stadium: Siwelele vs Magesi 15h00.
EDanie Craven Stadium: Stellenbosch vs Orbit College 15h00.