22 | Ezemidlalo
Friday, 15 August 2025
IWallabies iyazethemba 'ukunquma' AmaBhokobhoko
Leli qembu lase-Australia lizimisele ngokubuyisa isithunzi salo
NGUMQEQESHI weWallabies yase-Australia, uJoe Schmidt
ISITHOMBE NGABE: BACKPAGEPIX
Nhlanhla Hudla
UMQEQESHI weqembu lesizwe lase-Australia, iWallabies, uJoe Schmidt, uthi bakulungele ukubhekana namaBhokobhoko koweCastle Lager Rugby Championship ngoMgqibelo ngo-17h10 e-Ellis Park Stadium, eGoli.
Lona kuzokuba wumdlalo wokuqala wanonyaka wala maqembu anomlando omude embhoxweni.
USchmidt wangena ezicathulweni zika-Eddie Jones owaxoshwa emuva kokushaya udaka kwaleli qembu emqhudelwaneni wendebe yomhlaba eyayiseFrance ngo-2023.
IWallabies yawasha ijezi ekuseni kwindebe yomhlaba, okwenza izikhulu zayo zangananaza ukumfaka amasondo uJones.
NGU-OX Nche okulindeleke ukuba abe ngelinye lamafolosi AmaBhokobhoko azothwalisa kanzima iWallabies.
ISITHOMBE NGABE: BACKPAGEPIX
Ekhuluma ngaphambi komdlalo wezakhe uSchmidt, uthe ezakhe zikulungele ukubhekana neqembu laseNingizimu Afrika elidume ngokungagayelwa mphako enkundleni, okufakazelwa wukuthi yilona eliwunombolo 1 emhlabeni kulo mdlalo.
"Sikhombise ukuba ngcono emidlalweni yethu edlule. Iqembu libukeka lisesimweni esihle kakhulu, futhi kangingabazi ukuthi sizokwenza kahle kule midlalo njengoba sibheke ukubuyisa ngayo isithunzi sethu," esho.
* Kusenjalo, luyaqhubeka uchungechunge lwemidlalo yeCarling Currie Cup egijinywa ngamaqembu aseNingizimu Afrika. Imidlalo yangale mpelasonto yalo mqhudelwano iqhathwe kanjena:
NGOLWESIHLANU
Suzuki Griquas vs Hollywoodbets Sharks XV 15h00.
NGOMGQIBELO
Toyota Cheetahs vs DHL Western Province 14h00.
Airlink Pumas vs Fidelity ADT Golden Lions 14h00.
NGESONTO
Sanlam Boland Kavaliers vs Vodacom Bulls 15h00.