Abasemanyuvesi nokuqhakambisa ingoma kwezemfundo

Mthobisi Sithole

IHLOME ngabadlule ebunzimeni basenyuvesi ingoma yezitshudeni zasezikhungweni zemfundo ephakeme, ezokuba ngoMgqibelo ntambama e-Anderson Park, ePinetown, eThekwini.

Phakathi kwalaba kubalwa uNkz Zama Mncube, owayephethe kwesobumengameli bezitshudeni zaseDurban University of Technolgy (DUT) eminyakeni edlule; ngowayephethe eMangosuthu University of Technology (MUT), uMnu Sandile Dlamini; nowayephethe e-University of KwaZulu-Natal (UKZN), uDkt Qiniso Mbatha.

Bonke bazobe befundisa kabanzi ngokubaluleka kokungalahlwa kwemvelaphi yesintu uma izitshudeni sezifunda emanyuvesi.

UNkz Peace Mabe oyisekela likangqongqoshe wezobuciko namasiko kuzwelonke, noMengameli waMabhinca uNgizwe Mchunu, bangabanye abazobe begqugquzela isintu kule ngoma.

NGUMCULI kamaskandi, uLimit.

Umsunguli wayo, uMnu Sanele "Phoyisa" Hlongwa, uthi inhloso yokumenywa kwalaba abadlule oqeqeshweni lwenyuvesi, yingoba sebephumelele kwezemfundo.

"Kubalulekile ukuba izitshudeni zibukele ebantwini abadlule ebunzimeni bezinkinga ezenzeka emanyuvesi. Inhloso yale ngoma wukuthi sigqugquzele izitshudeni ukuba zingazenyezi ngengoma yesintu.

"Inyuvesi ihlanganisa abantu abanezinkolelo ezingafani, kanti nokudukisana kuningi, ngakho-ke sifuna baziqhenye ngesiko labo, imfundo ingabadukisi," kusho uMnu Hlongwa.

NGUMCULI kamaskandi, uMjolisi.

Kulo mcimbi kuzobe kungenwa mahhala. Emuva kwengoma, kuzobe kunandisa abaculi okubalwa kubona uFalabo, uLimit, uKhuzani, uNyonemhlophe, uMjolisi, uNdoni, uNjoko, uMenzi, uNtencane, uGatsheni, iNkosi Yamagcokama, uSaliwa, uBig Zulu, uMjabulisi, uNavigator, uLuve, uJumbo, Dlala Thukzin, uJaiva, uLihle Xhakaza, uDizaster, uDulas, uGadla Nxumalo, uMzukulu kaNyathela, iChubelihle, uDj Fuze, uLungelo Hlongwane, inhlangano yamazayoni yezitshudeni zasemanyuvesi i-Associatuon for Tertiary Zion Students (ATEZS), neNazareth Tertiary Students Association (NATESA).

UNgqongqoshe wezeMpilo KwaZulu-Natal, uNkk Nomagugu Simelane-Mngadi, uzobe enomkhankaso omayelana nezifo zocansi, ewubhekise kwizitshudeni.

Phakathi kwezikhungo zemfundo ephakeme nezamakhono ezizobe ziyingxenye yalo mcimbi kubalwa iMUT, iDUT, i-UKZN, i-University of Zululand, i-University of Pretoria ne-University of Johannesburg.

Lo mcimbi wesekwe wuMnyango wezeMfundo ePhakeme, owezempilo esifundazweni neNational Youth Development Agency (NYDA).
mthobisis@ilanganews.co.za