NGU-EMILE Witbooi wamaJombos egadulisa uMohamed Akram weQatar kowamaqoqo.

ISITHOMBE NGABE: BACKPAGEPIX

Mfanafuthi Ndlovu

UTHEMBE ukugadla izitha ngokusebenzisa ubuthaka bazo umqeqeshi weqembu lesizwe laseNingizimu Afrika lika-Under 17, AmaJimbos, uVela Khumalo.

AmaJimbos azogadulisana neJapan koweLast 32 yeNdebe yoMhlaba yeFifa U/17 yalo mqhdelwano ngoMgqibelo ngo-15h30 e-Aspire Zone, eDoha.

UKhumalo uye kule midlalo esexhuga emuva kokuba uSteven Mendes weKaizer Chiefs - ongomunye wabadlali abegadla ngabo - ehluleke wukuphasa ukuhlolwa kweminya ngeMagnetic Resonance Imaging Scan (MRi) - ngokwenqubo yeFifa.

Nokho lo mqeqeshi ukwazile ukubeka leli qembu endaweni enhle kule midlalo eqale mhla ka-3 Novermber.

Ebuzwa uKhumalo mayelana nezinhlelo zomdlalo neJapan, uthe bawubheke ngabomvu, futhi bakwazile ukubheka wonke amakhonco abuthaka ezitha.

Uthe konke sekulele kubadlali ukuzibonakalisa.
" Sigculisekile ngeqembu esizogadla ngalo kulo mdlalo wethu neJapan.

"Ngeke sikwazi ukulala, kufanele sisebenze kanzima kulo mdlalo. Ngenhlanhla, kulo mqhudelwano sikwazile ukubona lapho ibuthaka khona.  

"Siyazi ukuthi inomdlali ovutha kabi, ogqoka ijezi leshumi. Nokho, kayilona iqembu elingasinika inkinga, nginalo ithemba lokudlulela phambili," kusho uKhumalo.

" Siyaqala ukufinyelela kulesi sigaba sendebe yomhlaba, okuhle nakakhulu wukuthi esikwatini sami, cishe bonke abadlali basitholile isikhathi esanele semidlalo (ukulungiselela lo mqhudelwano).

"Uma ubheka, sibe nabadlali abaningi abalimele ngaphambi kwale midlalo. Ikhanda seliphethene ngasohlangothini lwabaqeqeshi mayelana nokuthi yibaphi abazoqala umdlalo weJapan. Kungaba kuhle kakhulu uma singakwazi ukudlulela phambili.

NGUMQEQESHI wamaJimbos, uVela Khumalo echushisa omunye wabadlali bakhe, uKamogelo Mareletse.

ISITHOMBE NGABE: BACKPAGEPIX

UKamogelo Mareletse ongukaputeni wamaJimbos, uthe bazozama ngazo zonke izindlela ukungaphoxi kulo mqhudelwano,  wathi abadlali bawulungele.

UDanny Jordaan ongumengameli weSouth African Football Association (Safa), uncome iqembu likaKhumalo, wathi no-Arsene Wenger _ owaqeqesha i-Arsenal yase-England iminyaka eminingi -  walincoma ngesikhathi lidlala Afcon U/17.  Uqhube ngokuthi nezingqapheli zeFifa ezikhona kulo mqhudelwano, kaziwuvali umlomo ngamaJimbos.

Sekuwumlando ukuthi leli qembu ngaphambi kokudlulela ku-last 32, lishaye iBolivia ngo-3-1, labamba neQatar kuba ngu-1-1, lanikwa induku ka-3-1 yi-Italy.
Liqede imidlalo yamaqoqo lisendaweni yesibili, kuqhwakele i-Italy.