Ezifingqiwe

01

AMALUNGU ekomidi lasePhalamende eliphenya ngokugxambukela kosopolitiki emsebenzini wamaphoyisa, akhale ngobufakazi "obungenasisekelo" obethulwe nguMnu Cedrick Nkabinde (osesithombeni esingenhla), ngesikhathi evele phambi kwalo eKapa izolo.

UNkabinde usolwe ngokungathembeki ngokufika nobufakazi obungenayo into ephathekayo. Lokhu kuphoqe ukuba kusheshe kuvalwe ukwethulwa kobufakazi bakhe, wayalelwa ukuba aphinde abuye esenobufakazi obuphathekayo, obuzokwazi ukusiza leli komidi lifinyelele kumnyombo wophenyo lwalo.

UNkabinde ungomunye wofakazi abaqavile kuleli komidi, njengoba igama lakhe lavela ngesikhathi kunesigcawu sabezindaba sangomhla ka-6 kuJulayi, esasibizwe nguJenene uNhlanhla Mkhwanazi onguMkhuzi wamaphoyisa KwaZulu-Natal.

Uphenduke 'ihlathi' exoshwa, etshelwa ukuya kwakhe afike azibuke esibukweni, abuye esezimisele ngokuzonekela leli komidi okuyikho ngokwenzeka embuthweni wamaphoyisa.
Bheka nasekhasini 4.

                  02

UYAQALA umkhankaso wengoma yokuhlukanisa unyaka emsakazweni Ukhozi FM, njengoba namhlanje ngoLwesihlanu kulindeleke ukuba kumenyezelwe izingoma eziwu-20, okufanele umphakathi uvotele eziyishumi okuzohlungwa kuzona okuyiyona ezofaka abalaleli balo msakazo onyakeni omusha.

Kulo 20 ozomenyezelwa namhlanje, kuzobhekwa ukuthi ziphume phakathi komhla ka-1 kuJanuary wango-2025 nomhla ka-31 ku-October wango-2025.

Kumele kube yizingoma ezihambe phambili ngokudlalwa nasezinkundleni zokuthengiswa komculo kanjalo nasezinkundleni zokuxhumana.

Umculi ozodla ubhedu, uzoklonyeliswa ngemoto bese kuthi abalaleli abazovota kakhulu, babe sethubeni lokuzititilizela imiklomelo eyahlukene.

03

NGUNKZ Khumbudzo Ntshaveni, othi iNingizimu Afrika kayinankinga ngokuduba kweMelika iG20.

UNGQONGQOSHE eHhovisi likaMengameli uNkz Khumbudzo Ntshavheni, uthe uhulumeni waseNingizimu Afrika kawukhathazekile ngesinqumo se-United States of America sokuduba ingqungquthela yamazwe i-G20, ezokuba kuleli ekupheleni kwale nyanga.

UNkz Ntshavheni uthe izinhlelo zale ngqungquthela ezosingathwa kuleli ziyaqhubeka, futhi sebemi ngomumo ukwamukela abanye omengameli bamazwe, abazoba yingxenye yale ngqungquthela. Kulindeleke ukuthi le ngqungquthela iqale ngesonto elizayo.

NgoLwesithathu uMengameli uCyril Ramaphosa ucashunwe yimithombo yabezindaba ethi izilimaza yona i-USA ngokuzihlangula kule ngqungquthela emqoka njengoba kuyiyona ehamba phambili kwezomnotho emhlabeni.

04

UMENGAMELI uCyril Ramaphosa (osesithombeni esingenhla) wenze izinguquko kwikhabhinethi yakuleli, ememezela uMnu Willie Aucamp esikhundleni sokuba nguNgqongqoshe wezamaHlathi, ezasoLwandle nezeMvelo.

U-Aucamp ungena esikhundleni ebesiqhoqhobelwe nguDkt Dion George, okhishwe kusona ngemuva kokuba iqembu lakhe libhalele umengameli ukwenza lezi zinguquko.

URamaphosa uphinde wamemezela uNkz Alexandra Abrahams ukuvala isikhundla sokuba yiPhini likaNgqongqoshe wezoHwebo nokuQhudelana.

I-DA yiyona eyalele umengameli ukwenza lezi zinguquko, njengoba iyingxenye kahulumeni wenhlanganisela kuleli (GNU).